Елорда тұрғындары Тәуелсіздік даңғылының бойындағы жаңа көпір арқылы жиі қатынайды. Бұл көпір көшелердегі кептелісті едәуір азайтуға мүмкіндік береді. Мәселен, Мәңгілік Ел даңғылы 20%-ға дейін, Сарайшық көшесі мен Ұлы Дала даңғылындағы көпір тиісінше 15%-ға дейін азайды, деп хабарлайды Egemen.kz елорда әкімдігінің ресми сайтына сілтеме жасап.
Жаңа көпірдің арқасында Мәңгілік ел даңғылының Ұлы Дала даңғылы мен Керей Жәнібек хандар көшесі аралығында көлік нөпірі тәулігіне орта есеппен 19%-ға азайғаны байқалған. Сондай-ақ таңертеңгі қарбалас сағаттарда 14%-ға, ал кешкі қарбалас уақытта 5,5%-ға төмендеуі байқалады.
Мәңгілік ел даңғылының бойында Керей Жәнібек хандар көшесінен Қонаев көшесіне дейінгі учаскеде (солтүстік бағытта) кептеліс кешкі уақытта 11,8%-ға, оңтүстік бағытта 8,2%-ға төмендеген. Сондай-ақ қарқындылықтың таңертеңгі уақытта 21,2%-ға азайған (оңтүстік бағытта).
Сондай-ақ көпірдің Түркістан көшесіндегі көлік кептелісіне де оң әсерін ерекше атап өтуге болады. Ұлы дала даңғылынан Керей Жәнібек хандар көшесі аралығындағы Түркістан көшесінде қарқындылықтың тәулігіне төмендеуі солтүстік бағытта – 12,5%. Сондай-ақ қарқындылықтың таңертеңгі қарбалас уақытта 21%-ға, кешкі уақытта 17%-ға азайғаны анықталған.
Деректерді «Sergek ITS» талдау, мониторинг және көліктік болжау бойынша Интеллектуалды көлік жүйесі арқылы мамандар дайындайды.
Естеріңізге салайық, Тәуелсіздік көпірі Алматы мен Есіл аудандары арасындағы қосымша байланысты қамтамасыз етеді. Сол сияқты өзге көшелердегі кептелісті едәуір азайтуға мүмкіндік береді: сол жағалауды Тәуелсіздік даңғылымен, жаңа теміржол вокзалымен, Қошқарбаев даңғылымен, Нәжімеденов көшесімен, Әзірет Сұлтан мешітімен, Байтұрсынов, Қордай, Айнакөл көшелерімен, Момышұлы даңғылымен және т.б. қосымша байланысты қамтамасыз етеді.
Көпір сегіз жолақты – екі бағытта төрт жолақтан. Көпірдің шет жақтарында жаяу жүргіншілер аймақтары мен веложолдар бар. Ал көгалдандыру жұмысы көктемде аяқталады.