«Номад» топ жарды

Елордалық ұжым Польшаның «Ка­товице» командасымен кездесті. Матч барысында хоккейшілер тартысты ойын өткізді. Бірінші кезеңде есеп өзгеріссіз қалғанымен, екінші кезеңде «Катовице» ойыншысы Райан Кук 35-минутта есеп ашып кетті. Алайда араға 2 минут салып «Номад» сапынан Максим Мусоров (37-минутта) таразы басын теңестірді.

Үшінші кезеңде Олег Бойко – 41, Алан Гатиягов 53-минутта елордалық клубтың ба­сымдығын арттыра түсті. Осылайша, «Но­мад» қар­сыласын 3:1 есебімен тізе бүкті­ріп, Құр­­лық­тық кубок ойындарының жеңімпазы атанды.

Фёдор Полищук жаттықтыратын «Но­мад» алғашқы екі ойында «Хернинг Блю Фокс» (Дания) клубынан 5:2 есебімен басым түссе, Уэльстің «Кардифф Девилз» хоккейшілерін 7:2 есебімен ойсырата жеңді.

Құрлықтық кубок Халықаралық шайбалы хоккей федерациясы аясында 1997 жылдан бері тұрақты түрде өткізіліп келеді. Бүгінге дейін еліміздің атынан қа­тыс­қан Көк­шетаудың «Арлан» командасы 2018/2019 жылғы турнирде бас жүл­дені жеңіп алған. Сондай-ақ әр жылдарда «Бейбарыс» (Атырау), «Сарыарқа» (Қа­рағанды), «Номад» (Астана) 2-орынға жайғасса, «Қазцинк-Торпедо» (Өскемен) қола жүлдегер атанған еді.