Әйелдер құқығы мен балалардың қауіпсіздігін қамтамасыз ету бойынша Мәжілістің жалпы отырысында Ажар Сағындықова депутаттық сұрағын Еңбек және халықты әлеуметтік қорғау министрлігі өкіліне жолдады, деп хабарлайды Egemen.kz.
Депутат А.Сағындықова өз сөзінде аталған ведомство қиын ахуалдағы отбасыларды қалай анықтайтынын, оларға қандай қолдау шаралары көзделгенін сұрады.
Еңбек және халықты әлеуметтік қорғау министрлігі өкілінің айтуынша, былтыр қабылданған әлеуметтік кодекс шеңберінде жаңашылдық енгізілді, бұл – отбасының цифрлық картасы.
«Отбасының цифрлық картасы қазіргі уақытта басқа да мемлекеттік органдардың цифрлық жүйелерімен біріктірілген, соның арқасында біз барлық Қазақстандағы отбасылардың жағдайы туралы, олардың құрамы туралы ақпаратты алуға мүмкіндігіміз бар. Сонымен қатар былтыр министрліктің халықтың әлеуметтік салауаттығын айқындау бұйрығы қабылданған. Осы әдістеме негізінде Қазақстандағы отбасылар 5 деңгейге бөлініп, оларға сәйкес қандай мемлекеттік шара қолдануды алдын ала біліп отырамыз. Бүгінде практика түрінде қызмет көрсетуге мүмкіндік бар», деді министрлік өкілі.