Конфессияаралық және өркениетаралық диалогті дамыту жөніндегі орталықта «Әлемнің тұрақты дамуына қол жеткізудегі діни лидерлердің рөлі» тақырыбында халықаралық онлайн-конференция өтті.
Іс-шараға Мәдениет және ақпарат министрлігі Дін істері комитетінің төрағасы Е.Нүкежанов, Конфессияаралық және өркениетаралық диалогті дамыту орталығы басқарма төрағасының міндетін атқарушы Д.Есенова, Ислам ынтымақтастығы ұйымы жанындағы ислам, өнер және мәдениет тарихын зерттеу орталығының (IRCICA) бас директоры Махмуд Эрол Кылыч, халықаралық ұйымдардың, Үндістан, Түркия, Мысыр, Пәкістан, Ұлыбритания, Ресей, Израиль, Ватикан елдерінің ғылыми және сараптамалық қоғамдастығының өкілдері қатысты.
Конференция барысында қатысушылар діни лидерлердің өркениетаралық және дінаралық диалогті нығайтуға, олардың ұзақмерзімді тұрақтылығына қол жеткізуге және халықаралық қақтығыстың алдын алуға қатысуын кеңейтудің негізгі аспектілерін талқылады, сондай-ақ Әлемдік және дәстүрлі діндер көшбасшылары съезі Хатшылығының XXI отырысында қабылданған «Әлемдік және дәстүрлі діндер лидерлері съезін дамытудың 2023-2033 жылдарға арналған Тұжырымдамасын» іске асыру жөнінде пікір алмасты.
«Діни көшбасшылар мен діни дипломатияның рөлі әлемдік саяси көшбасшылармен, халықаралық ұйымдармен және діни қауымдастықтармен диалог үшін маңызды. Әлемнің жетекші діни көшбасшыларының халықаралық агрессорларға тікелей бірлескен үндеуі қазірдің өзінде халықаралық шиеленісті төмендетуі мүмкін», деді жиында Дін істері комитетінің төрағасы Е.Нүкежанов.
ИЫҰ жанындағы ислам, өнер және мәдениет тарихын зерттеу орталығының (IRCICA) бас директоры Махмуд Эрол Кылычтың айтуынша, 2022 жылы Әлемдік және дәстүрлі діндер көшбасшыларының VII съезінде қабылданған декларация діндер кездесетін жерлерде жемісті консультативтік негіздің болуын қамтамасыз етеді. «Құжат діндер мен олардың көшбасшыларының адамзат үшін әділ және бейбіт болашақ құрудағы рөлін көрсетеді», деді ол.
Ал Үндістандағы «Somaiya Vidyavihar» университетінің ректоры Самир Шантилал Сомайя жүрегі кең адамдар үшін әлем бір отбасы екенін атап өтті. «Климаттың өзгеруі жағдайында біз әлемді өзіміздің отбасымыз ретінде қабылдаудан басқа амалымыз жоқ екенін түсінуіміз керек. Өзіңіз туралы ойлау – бұл әлем туралы ойлау. Біз қасиетті жазбалардан шабыт алуымыз керек, ғылым үйренуіміз керек, шындыққа көз жүгіртіп, әрекет етуіміз қажет», деп атап өтті ол.
Конференция модераторы Д.Есенова қатысушылардың баяндамаларын қорытындылай келе, оларға іс-шараны жан-жақты және дәйекті қолдағаны үшін ризашылығын білдірді, сондай-ақ дінаралық диалогті ілгерілетуде, бейбітшіліктің орнықты дамуына және әріптестікті одан әрі кеңейтуге қол жеткізудегі діни көшбасшылардың рөлі орасан екенін айтты. Халықаралық онлайн-конференция қорытындысы бойынша сарапшылар әлемдік және дәстүрлі діндердің жаһандық диалогін дамытуда елдердің халықаралық бастамаларының маңыздылығын атап өтті, сонымен қатар дінаралық диалогті нығайту мәселелері бойынша одан әрі жемісті ынтымақтастық туралы уағдаластыққа қол жеткізді.