Қазақстан Республикасы Мәдениет және спорт министрлігі Дін істері комитетінің төрағасы Ғалым Шойкиннің басшылығымен құрылған делегация Түрік Республикасына жұмыс сапарымен келді.
Сапар барысында Ғ.Шойкин Түркияның Дін істері басқармасының төрағасы Мехмет Гөрмезбен, «Хасеки» дін орталығының басшылығымен және Анкара, Ыстамбұл, Кония қалаларында орналасқан дін істері басқармаларының өкілдерімен кездесті.
Кездесу кезінде Қазақстан мен Түркия дін басқармаларының өкілдері екі мемлекет арасындағы теологиялық білім беру бағытындағы қарым-қатынас деңгейін талқылады. Атап айтқанда, Түркия Дін істері басқармасының төрағасы М.Гөрмез бауырлас Қазақстанмен қарым-қатынасты кеңейтуге және нығайтуға дайын екендігін білдірді. Сонымен қатар, ол қазіргі таңда Түркия аумағында 85 мың мешіт, 700-ге жуық теологиялық лицей мен құран оқып үйрену курстары және Түркия жоғары оқу орындарында 100-ге жуық теологиялық факультеттердің бар екендігін хабарлады. Жоғарыда аталған барлық мешіттердің және оқу орындарының қызметін Дін істері басқармасында жұмыс істейтін 1000-ға жуық қызметкер мен сарапшы қадағалайтынын жеткізді.
Сонымен қатар, М.Гөрмез Түркияда имамдардың мемлекеттік қызметкер мәртебесіне ие екендігін және олар қажетті әлеуметтік пакетпен қамтамасыз етілетіндігін айта отырып, қазіргі таңда елде мемлекет тарапынан қаржыландырылатын лицей мен колледж деңгейіндегі діни оқу орындарында және жоғары оқу орындарында теoлогиялық факультеттердің бар екендігін мәлімдеді. Дін саласында жасалған қажетті жағдайлардың нәтижесінде халықтың діни сауаттылығы жоғары екенін және экстремистік ағымдардың Түркия халқының сана-сезіміне әсер ету деңгейі өте төмен екенін атап көрсетті.
Кездесу нәтижесінде қазақстандық діни қызметкерлерге теологиялық білім беру және басқа да діни бағыттар бойынша екі елдің ведомстволараралық қарым-қатынасын нығайтуға бағытталған хаттама дайындау жөнінде уағдаластыққа қол жеткізілді.
«Егемен-ақпарат».