Кеше палата Төрағасы Қабиболла Жақыповтың төрағалығымен Мәжіліс бюросы өтіп, онда алдағы жалпы отырыстың күн тәртібі нақтыланды, деп хабарлады Мәжілістің баспасөз қызметі.
Палата сақтандыру және исламдық қаржыландыру мәселелері бойынша заңнамалық жаңа енгізілімдерді екінші оқылымда қарайды.
Сондай-ақ, депутаттар талқысына Қазақстан мен Мажарстан арасындағы олардың мемлекеттерінің аумағында заңсыз тұратын адамдардың реадмиссиясы туралы үкіметаралық келісімді және мүгедектердің құқықтары туралы конвенцияны ратификациялауға қатысты құжаттар ұсынылып отыр.
Осы күні мәжілісмендер бірқатар жаңа заң жобалары бойынша қорытынды әзірлеу мерзімін анықтайды. Олардың қатарында кәсіпкерлік пен азаматтық процестік туралы кодекстер, сондай-ақ, өзін өзі реттеу, бағалы металдар мен асыл тастар, ауыл шаруашылығы кооперациясы, мемлекеттік-жекешелік әріптестік туралы заң жобалары бар.
Сонымен қатар, жалпы отырыста мемлекеттік сатып алу, экологиялық мәселелер бойынша түзетулер енгізуге қатысты және реадмиссия туралы қазақстандық-белорустық үкіметаралық келісімді ратификациялау бойынша қорытынды әзірлеу мерзімі тағайындалады.