Қарқаралыдағы елу бес жылдық тарихы бар «Салтанат» халықтық ән-би ансамблінің жұлдызы биіктен жарқырады. Жақында ансамбль Польшада өткен халықаралық «Świat Pod Kyczerą» фольклор фестивалінен Бас жүлде иеленіп келді.
Жарты ғасырдан аса тарихы бар ансамбльді Қарағанды облысы мен Қарқаралы ауданының басшылығы қолдап, өнер байқауына арнайы шақыртумен аттанған еді.
Кезінде арнайы шақыртулармен жарты әлемді шарлаған, қазақ өнерін талай елге таныстырған өнер ұжымы кейінгі жиырма жылдың ішінде алыс сапарлардан шектеліп қалғандай еді. Міне, ұзақ күткен сапардан олжалы оралып, жерлестерін шаттыққа бөлеп жатыр.
Жарты ғасыр ішінде өнер ұжымының құрамы әрдайым толысып, жаңарып отырды. Бұл жолы танымал өнер майталманы Темірбек Сыздықов даярлаған, отыз бес адамнан құралған ән-би ансамблі Еуропа төріне мықты әзірлікпен барыпты. Репертуары бай ансамбль поляк елінде лайықты өнер көрсетіп, қазақтың әні мен биіне әлем халқын тамсандырып қайтқаны айғақ оған.
Дүниенің әр түпкірінен жиналған өнер ұжымдары алдымен бірнеше топқа бөлініп, Польшаның Легница, Лосице, Шпротава, Польковице, Хойнув, Верчице, Волув, Поляница-Здруй, Рудно, Заменице елді мекендерінде концерт қойды. «Салтанат» ән-би ансамблі фестиваль бағдарламасы бойынша Легница қаласында өнер көрсетті. Фестивальдің тағы бір ерекшелігі – оған қатысқан өнерпаздар сахнада ғана емес, әр қаланың орталық көшелерінде болатын халықтық шерулерге де қатысады. Өз елдерінің өнерін паш етеді. Фестивальда әр мемлекеттің өкілдері өз халқының сахналық өнерімен қатар салт-дәстүрлерін, ұлттық қолөнер және тағам өнімдерімен де таныстырады.
Ұйымдастырушылардың мұндағы мақсаты – дүние жүзіне әлем халықтарының ұлттық дәстүрлері мен өнерін дәріптеу. Сол арқылы бейбітшілікті, бірлікті насихат ету. Фестиваль шырайын Гала-концерт, басқа да мерекелік кештер аша түскен.
Он күнге созылатын өнер жәрмеңкесінің аясында жерлестеріміз Легница қаласы басшылығының құрметті қабылдауында да болады.
Мұнымен қоса, осы бір өнер додасы «Świat Pod Kyczerą» халықаралық фольклор фестивалінің әлеуметтік желідегі парақшалары мен арналары арқылы тікелей эфирден көрсетіліп отырды.
Еуропа төрінде үздік өнер көрсетіп, елге олжалы келген «Салтанат» халықтық ән-би ансамблі ұжымын жерлестері сән-салтанатпен қарсы алды.
Қарағанды облысы,Қарқаралы ауданы