Қазақ-Британ техникалық университетінде Президент жанындағы Ұлттық ғылым академиясының ұйытқы болуымен Мемлекет басшысы Жолдауын іске асыру аясында «Қазақстан ғылымының қазіргі жағдайы мен даму келешегі» атты ғылыми-практикалық конференция өтті. Оған Ғылым және жоғары білім министрлігінің өкілдері, ҰҒА академиктері, жоғары оқу орындары мен ғылыми зерттеу институттарының басшылары, еліміздің және шетелдің жетекші ғалымдары, тәуелсіз сарапшылар, сондай-ақ отандық ғылымды дамытуға белсене атсалысатын жас ғалымдар қатысып, ғылымды дамыту мен жас мамандар әлеуетін арттыруға қатысты ой-пікірлерімен бөлісті.
Жиында Президент жанындағы Ұлттық ғылым академиясының президенті Ақылбек Күрішбаев Мемлекет басшысының Жолдауында еліміздің әлеуметтік дамуы мен экономиканың инновациялық әлеуетін күшейтуге байланысты аса маңызды міндеттер қойып отырғанын атап өтті.
«Бұл тапсырманы жүзеге асыруда ғалымдарға ерекше жауапкершілік жүктеледі. Сондықтан ғылымның күш-қуаты ғылыми зерттеулердің тиімділігін арттыруға, зерттеу қызметіне бөлінген қаражатты дұрыс пайдалануға, оның нәтижесін өндіріске енгізуге бағытталуға тиіс. Бұл ретте қайта құрылған Президент жанындағы Ұлттық ғылым академиясы жетекші рөл атқарады. Мәселен, ғылыми зерттеулер деңгейін арттыру, ғылымды басқару моделін жетілдіру, экономиканы әртараптандыру мен қоғамды дамытуға ғылымның басым бағыттарын анықтау қажет. Өкінішке қарай, ғылымды қаржыландыру көлемі ұлғайғанымен, зерттеу бағыттары кенжелеп қалды. Осы орайда ҰҒА экономиканың нақты секторын дамытуда басым бағыттағы зерттеулерді қаржыландыруға көңіл бөліп, оның тиімділігін арттыруды іске асырады», деді ол.
Сондай-ақ конференция барысында сарапшылар ғылымды цифрландыру, жасанды интеллектіні дамыту, денсаулық сақтау жүйесін реформалау, ауыл шаруашылығын дамытуға бағытталған мемлекеттік қолдау шараларын жетілдіру және Жолдауда көрсетілген басқа да маңызды мәселелерді іске асыруға байланысты ұсыныстарын ортаға салды.
АЛМАТЫ