Мәжіліс Төрағасы Қабиболла Жақыпов Еуропадағы қауіпсіздік және ынтымақтастық ұйымының Аз ұлттар істері жөніндегі Жоғарғы комиссары Астрид Турспен кездесті, деп хабарлады Мәжілістің баспасөз қызметі.
Қ. Жақыпов мейманға Мәжілістің ұйымдастыруымен өтетін ҚХА 20 жылдығына арналған «Қазақстандық жол: Бірлік. Патриотизм. Реформалар» халықаралық конференциясына қатысуға ниет білдіргені үшін өз алғысын жеткізді.
Осы ретте Мәжіліс Спикері Қазақстан Президенті Нұрсұлтан Назарбаев саясатының басым бағыттарының бірі – ұлтаралық келісім мәселесі екенін атап өтті.
Қ. Жақыповтың айтуынша, біздің еліміз ЕҚЫҰ-мен сындарлы ынтымақтастықты, соның ішінде, азаматтық тұрақтылықты қамтамасыз ету мәселелері бойынша ықпалдастықты өте жоғары бағалайды.
Одан әрі Мәжіліс Төрағасы Қазақстанда этникалық топтардың дамуы, тілінің, мәдениеті мен әдет-ғұрпының сақталуы үшін барлық жағдай жасалғандығына тоқталды. Мәселен, бүгінгі күні біздің елімізде 97 мыңнан астам оқушы 37 мектепте, сондай-ақ, 171 аралас мектепте өзбек, тәжік, ұйғыр тілдерінде білім алады. Сонымен қатар, Қазақстан этностарының 15 тілде 37 газеті және 11 тілде журналы шығады.
Астрид Турс Қазақстанда Жоғарғы комиссар кеңсесі ашылған күннен бастап, тиімді үнқатысу орнап, ҚХА-мен өзара белсенді іс-қимыл жүргізіліп келе жатқанын атап өтті.
Тараптар сондай-ақ, Аз ұлттар интеграциясы туралы және Қазақстан халқы Ассамблеясының іс-тәжірибесі төңірегінде әңгіме қозғады.