Мемлекеттік хатшы сингапурлық ғалымдармен кездесті

Кеше Қазақстан Республикасының Мемлекеттік хатшысы Гүлшара Әбдіқалықова Назарбаев Университеттің алғашқы түлектерінің оқу орнын бітіруге арналған салтанатты шарасы аясында Сингапур ұлттық университетінің Ли Куан Ю атындағы Мемлекеттік саясат мектебінің деканы Кишор Махбубани бастаған ғалымдар тобымен кездесті. Кездесуге Қазақстан Республикасы Білім және ғылым министрлігінің, Мемлекеттік қызмет істері және сыбайлас жемқорлыққа қарсы іс-қимыл агенттігінің басшылығы қатысты. Мемлекеттік хатшы елдер арасындағы екіжақты бай­ланыстардың жоғары деңгейін айтып, достық қатынастардың ны­ғаюына Сингапур мемле­кет­тілігінің негізін қалаушы Ли Куан Ю-дің зор үлес қосқандығын атап көрсетті. Соның ішінде, тұрақты негізде түрлі деңгейдегі делегациялармен өзара алмасулар жолға қойылған. Айталық, Назарбаев Университет пен Жо­ғары мемлекеттік саясат мектебі стратегиялық серіктес болып табылады. Гүлшара Әбдіқалықова әңгі­ме­лесушілерге Мемлекет басшысы ұсынған 5 инс­ти­тут­тық реформаны, соның бірі – эко­номикалық бағдар­ла­ма­ларды сапалы іске асыруды қамтамасыз ететін және мемлекеттік аппаратты қалып­тастыратын реформаны іске асыру барысы туралы хабардар етті. Мемлекеттік хатшы Син­га­пур­дың бұл бағытта елеулі табысқа қол жеткізгенін атап өтті және Қазақстанның кадрлар даярлау, дарынды жастарды іріктеу мен оларға одан әрі білім беру, соның ішінде «Болашақ» халықаралық сти­пендиясы шеңберінде оқыту мен қолдау саласы бойын­ша барынша тиімді ынты­мақ­тастыққа дайын екенін білдірді. Сыбайлас жемқорлықты түй­сіну индексі рейтингісінің жоғары (7-орын) сатысын нақтылаған ел ретінде сингапурлық делегация өз елінің сыбайлас жемқорлықтың алдын алу тәжірибесіне кеңінен тоқталды. Мемлекеттік хатшы сыбайлас жемқорлыққа қарсы құндылықтарды кең ауқымда на­си­хаттау саласындағы Синга­пур­дың тәжірибесіне Қазақстан қы­зығушылық танытатынын айтты. Кездесудің соңында Мем­лекеттік хатшы Г.Әбдіқалықова На­зарбаев Университеттің Жоға­ры мемлекеттік саясат мекте­бі мен Сингапур ұлттық универ­сите­тінің Ли Куан Ю атындағы Мем­ле­кеттік саясат мектебінің өзара тиімді серіктестік қарым-қаты­нас­тары Қазақстанның адами әлеуе­тінің одан әрі сапалы дамуына сеп­тігін тигізетіндігіне сенім біл­дірді. Раушан ТӘУІРХАНҚЫЗЫ,