Мәдениет және ақпарат министрі Аида Балаева Армения Республикасының Білім, ғылым, мәдениет және спорт министрі Жанна Андреасянмен кездесті.
Кездесу Қазақстандағы Арменияның мәдениет күндері аясында ұйымдастырылды. Бұл екі ел арасындағы мәдени байланысты нығайтуда маңызды қадам болды.
Кездесу нәтижесінде 2025–2026 жылдарға арналған мәдени-гуманитарлық ынтымақтастық саласындағы өзара байланыс жөніндегі іс-шаралар жоспарына қол қойылды. Құжат музейлер, шығармашылық ұжымдар, суретшілер арасындағы байланысты нығайтуға, сондай-ақ жастар саясаты мен волонтерлік қызметті дамытуға арналған.
Сонымен қатар Жанна Андреасян Арменияның мәдениет күндерін өткізуге атсалысқаны үшін Қазақстанға алғыс білдіріп, көрнекті армян режиссері Сергей Параджановтың 100 жылдығына орай маңызды іс-шара болғанын атап өтті.
Кездесу соңында министрлер музей және мұрағат ісі саласындағы ынтымақтастыққа, сондай-ақ өнер және деректі, көркем фильмдер түсіру саласындағы серіктестікті дамытуға қатысты көптеген мәселелерді талқылады.