Қазақстанда кәмелетке толмағандардың істері және олардың құқықтарын қорғау жөніндегі комиссиялар белсенді жұмыс жүргізіп жатыр. Осы жылдың тоғыз айында 30 мыңнан астам балаға комиссия жұмысы аясында қажетті көмек көрсетілген. Қолдау білім алуға қолжетімділікті, психологиялық, құқықтық және әлеуметтік көмекті, сондай-ақ оңалту іс-шараларын қамтыды, деп хабарлайды Egemen.kz Оқу-ағарту министрлігінің баспасөз қызметіне сілтеме жасап.
Министрліктің хабарлауынша, бүгінгі таңда елімізде бала құқығы бұзылуының алдын алу және оларға көмек көрсету бойынша мемлекеттік органдар мен ұйымдарды үйлестіруде негізгі рөл атқаратын 235 комиссия қызмет етеді. Ал олардың жұмыс тиімділігін арттыру үшін 2024 жылы нормативтік-құқықтық базаға елеулі өзгерістер енгізу жоспарланған. Оның ішінде жағдайды басқару (кейс-менеджмент) және медициналық-әлеуметтік есепке алу моделін енгізу бар.
«Отбасын қолдау орталықтарымен өзара іс-қимылға ерекше назар аударылатын болады. Бұл қиын өмірлік жағдайлардағы балаларды және олардың отбасыларын кешенді сүйемелдеуді қамтамасыз етуге мүмкіндік береді. Сондай-ақ, облыстық, қалалық және аудандық комиссиялар арасындағы өзара әрекеттесуі нақты ажыратылатын болады. Бұл балалардың құқықтарын қорғау жүйесінің жалпы тиімділігін арттырады және мемлекеттік басқару деңгейлері арасындағы іс-қимылдарды үйлестіруді жақсартып, мұқтаж балаларға көмек көрсетуді айтарлықтай жылдамдатады», деп атап өтті ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова.
Ведомство аталған шаралар балалардың құқықтарын қорғау жүйесін нығайтуға және өмірлік қиын жағдайға тап болған әрбір балаға уақтылы, сапалы көмекті қамтамасыз етуге бағытталғанын атап өтті.