Өзбекстандағы Ш.Рашидов атындағы Самарқанд мемлекеттік университетінде Абай атындағы ғылыми-мәдени орталық және қазақ тілі мен әдебиеті бөлімі ашылды.
Салтанатты іс-шараға Қазақстанның Өзбекстандағы елшісі Бейбіт Атамқұлов, Абай атындағы Қазақ ұлттық педагогикалық университетінің ректоры Болат Тілеп, Самарқанд мемлекеттік университетінің ректоры Рустам Халмурадов Қазақстан Ғылым және жоғары білім министрлігінің, Өзбекстан Жоғары білім, ғылым және инновациялар министрлігінің өкілдері қатысты.
Орталықтың ашылу салтанатында Абай атындағы Қазақ ұлттық педагогикалық университетінің ректоры Болат Тілеп сөз сөйлеп, ғылыми-мәдени орталық, қазақ тілі мен әдебиеті бөлімінің ашылуы – екі ел арасындағы ынтымақтастықты нығайту, білім мен мәдениет саласындағы байланыстарды дамыту жолындағы маңызды қадам екенін жеткізді.
«Бұл – шетелде Абай университеті тарапынан ашылған жетінші орталық. Самарқанд төрінде бой көтерген орталық тек білім мен тәжірибе алмасу алаңына айналып қана қоймай, түркітілдес халықтар арасындағы достық пен өзара түсіністік қарым-қатынасты дамытуға қызмет етеді», деді ол.
Іс-шара аясында Абай университеті өкілдері Самарқанд мемлекеттік университетінің ректоры Рустам Халмурадовпен, филология факультетінің профессор-оқытушылар құрамымен кездесіп, білім, ғылым саласындағы байланыс туралы пікірлесті.
Биыл Абай атындағы ҚазҰПУ-да Әлішер Науаи атындағы тіл және әдебиет орталығы ашылып, түркітілдес халықтарға ортақ тұлғаның шығармашылығын зерттеу және насихаттау іс-шаралары бастау алды. Қазіргі таңда Абай университетінде Өзбекстаннан келген 148 студент білім алады.