Қазақ ұлттық қыздар педагогикалық университетінің кітапханасына биыл күрделі жөндеу жасалып, ұлағатты ұстаз Сералы Қаниевтың есімі берілді, деп хабарлайды Egemen.kz.
Кітапхананың ашылуында сөз сөйлеген Ғылым және жоғары білім министрі Саясат Нұрбек: «Шын мәнінде бүгін – айтулы күн. Кез келген білім ошағының жүрегі – ол кітапхана. Ең жоғары стандартта жасалған, ең мықты электрондық, цифрлық платформалары бар бұл Ғылыми кітапхана студенттер мен оқытушылар, жалпы кітапсүйер қауым үшін білімдерін арттыруға бағытталған мықты орталық боларына сенімім мол», деп атап өтті.
Сералы Қаниұлы – Қазақ ұлттық қыздар педагогикалық университетінің дамуына үлкен үлес қосқан ардақты ұстаз, белгілі ғалым, физика-математика ғылымдарының кандидаты, доцент, Қазақ ССР ағарту ісінің үздігі, КСРО жоғары мектебінің үздігі, еңбек ардагері. 40 жылға жуық Қазақ қыздар педагогикалық институтында қызмет етіп, мыңдаған шәкірт тәрбиеледі.
Кітапхананың салтанатты ашылу рәсіміне Алматы қаласының әкімі Ерболат Досаев, Қазақ ұлттық қыздар педагогикалық университетінің басқарма төрағасы-ректоры Гүлмира Қанай және ұстаздың жақын туыстары да қатысты.
Алматы қаласының әкімі Ерболат Досаев бұл кітапхана білім мен мәдениеттің нағыз орталығы екенін атап өтсе, ұлағатты ұстаздың келіні Жанат Дербисалина университет ұжымына алғысын білдіріп, «Әкемізге осындай құрмет көрсетіліп жатқанына өте қуаныштымыз. Ол кісінің есімі университет қабырғасында, жүрегімізде мәңгілікке сақталады», деді.
Іс-шара аясында ҚР Ғылым және жоғары білім министрі Саясат Нұрбек Сералы Қаниевтың ұлы Берік Қаниевке кітапхананың ашылуына зор үлес қосқаны үшін Алғыс хат табыстады. Сонымен қатар Қазақ ұлттық қыздар педагогикалық университетінің басқарма төрағасы-ректоры Гүлмира Қанай да ризашылығын білдіріп, заманауи жабдықталған кітапхана студенттердің сапалы білім алуына зор ықпал ететіндігін атап өтті.
Кітапхана студенттер, оқытушылар және зерттеушілер үшін заманауи білім беретін мәдени орталыққа айналады. Мұнда олар ғылыми қорлармен жұмыс істеп, оқу және зерттеу жұмыстарын жүргізу үшін ең соңғы технологияларды пайдалана алады. Жаңа кітапхана кеңістігі ыңғайлылық пен жайлылықты ескере отырып жобаланған. Онда топтық және жеке жұмыстарға арналған алаңдар бар. Сондай-ақ озық жабдықтар мен электрондық ресурстар қолжетімді.
Іс-шарада қонақтар жаңартылған кітапхана ғимаратына экскурсия жасап, білім беру сапасын арттыруға бағытталған жаңалықтармен танысты.