Заманауи сайыс

Чемпионат Қарағанды қала­сының Пришахтинск бөлігінде орналасқан №33 мектепте өтті. Қаладағы 40 мектептен қатысқан 74 команда 8 санат бойынша бақ сынасты. Олардың роботта­ры «Қыз қуу», «Асық ату», «Көкпар», «Жамбы ату», «Бәйге», «Теңге алу», «Ханталапай», «Арқан тар­ту» ойындарында бәсекеге түс­ті. Мұнымен қоса, ұлттық салт-дәстүрді дәріптейтін шебер­лік сыныптары өтті. Балдыр­ғандардың рухты флешмобы да көпшіліктің көңілінен шықты.

– Ұлы дала құндылықтары біз­дің қоғамды біріктіреді. Бұл жа­рыс қазақ мәдениеті мен дәс­түрін заманауи технология­лары­мен ұштастырып отыр. Оқу­шы­лардың танымын кеңейте­ді. Қарағанды қаласының мек­теп­терінде техникаға бейім оқу­шылар үшін барлық жағдай жа­салған. Білім ордаларында робо­т­техника кабинеттері бар. Жабдықтар жаңартылып жатыр. Болашақ инженерлерге арналған көптеген үйірме, Steam зертханалары қосымша білім деңгейінде жұмыс істейді, – дейді қалалық білім бөлімінің басшысы Есентай Әшім.

9-дан 16 жасқа дейінгі оқушы­лар роботтарды жинау және бағ­дар­ламалау дағдыларын көрсетті.

– Мен роботтехникамен айна­лысқаныма 2 жыл болды. Көкпар туралы мол мәлімет жинадым. Бі­рақ мұнда бірінші барлық ерек­шелікті түсініп алу керек. Ал­ды­мен Робот шабандозды жыл­дам жинап, содан кейін оны смартфондағы «Bluetooth» арқы­лы сауатты басқару қажет, – деп бөлісті №33 мектеп-бөбекжай кешенінің 6-сынып оқушысы Ярослав Землянский.

Жарыс ұйымдастырушы­лар­дың бірі Мағжан Жұмабаев атын­дағы гимназияның роботтехника пәнінің оқытушысы Әділбек Бердіходжаев чемпионаттың ал­дында авторлық ережелер ал­дын ала жазылып, арнайы ойын алаң­дары жасақталғанын айтады.

– «Көкпар» санаты үшін элек­тронды табло жасалды. Мұн­да нағыз ойын атмосферасы сезіледі. Яғни онлайн режі­мінде барлық қатысушы мен жанкүйер жарысқа куә бола ала­ды. «Ханталапай» жаңа сана­ты: робот әртүрлі жерлерде шашы­раңқы асықтарды жинауы керек. Тапсырма оңай емес – объектінің қай жерде екенін есептеуге тиіс. Қажетті сызықты жоғалтпау да маңызды, – дейді Ә.Бердіходжаев. Ұйымдас­тыру­шы мұнымен қоса  ұлттық нақыш­тағы роботтехника чем­пионатының екінші мәрте өткенін атап өтті.

Алдағы уақытта да дәстүрлі түр­­де, республикалық, тіпті ха­лық­аралық деңгейде өткізгісі ке­ле­тінін жеткізді. Бұған да қомақ­ты қолдау қажеттігін де жасырмады.

Жарыс жеңімпаздары кубок, медальдармен марапаттал­ды. «Аlihanrobotics» онлайн ор­талығында тегін оқу мүмкіндігін де сыйлық етіп табыстады. «Ұлы дала ойындарының» абсо­лютті чемпионы атағын Мағ­жан Жұмабаев атындағы гимназия­ның командасы жеңіп алды.

Қарағанды облысы