Ақын мерейтойы Астанада тойланды

Астанада Қазақстанның еңбек сіңір­­ген қайраткері, Мемлекеттік сый­лық­тың лауреаты, «Құрмет», «Отан» орден­дерінің иегері Ақұштап Бақты­гереева­ның мерейтойына орай Қ.Қуа­ныш­баев атындағы Мемлекеттік ака­демиялық қазақ музыкалық-драма театрында «Жұбан» драмасы сахналанды. Елордалық көрермендермен бірге қойылымды Сенат төрағасы Мәулен Әшімбаев, Мәжіліс төрағасы Ерлан Қошанов, Мәдениет және ақпарат министрі Аида Балаева тамашалады.

Іс-шарада Аида Балаева көпшілікке Президент Қасым-Жомарт Тоқаевтың құттықтау хатын оқып берді.

«Халқымыз өзіңізді мәдениетіміз бен өнерімізді өркендетуге үлес қосып келе жатқан қарымды қаламгер, көрнекті қоғам қайраткері ретінде жақсы біледі және құрметтейді. Еңбек жолында бірқатар отандық газет-журналдар мен баспада жемісті жұмыс істеп, ұлттық әдебиетіміздің ілгері басуына күш-қайратыңызды жұмсадыңыз. Қазақ поэзиясына өзіндік өрнегіңізбен келіп, айшықты ойлар мен айрықша дара шумақтарыңызбен танылды­ңыз. Еліміздің мәртебесін асқақтат­қан Тәуелсіздік пен бейбіт өмірді және табиғат сұлулығын арқау еткен жалынды жырларыңызды талғамы биік оқырман жылы қабыл алды. Сонымен қатар отбасы құндылықтары, қыз баланың тәрбиесі, ананың қоғамдағы рөлі туралы пайымды пікірлеріңіз қолдау тауып келеді. Алдағы уақытта ел-жұрт­тың ортасында сый-құрметке бөленіп, шығар­машылық ізденістеріңіз табысты бола беруіне тілектеспін. Сізге мықты денсаулық және отбасыңызға бақ-береке тілеймін!» делінген құттықтау хатта.

Өз сөзінде министр көрнекті ақынды мерейжасымен құттықтай отырып, жастардың бойына рухани құндылықтарды сіңіруге, отан­шылдықты қалыптастыруға зор үлес қосқанын атап өтті.

– Президент атап өткендей, қазақ әде­биетінде Ақұштап Бақтыгереева­ның өзіндік өрнегі, орны бөлек. Себебі ақын апамыздың өлеңдері әр қазақ­тың жүрегі­не жақын. Оның поэзиясы ерекше сыр­­шылдықпен, сезімталдықпен өріл­­­ген. Қаламгердің қазақ әйелінің бей­­не­­­­сін асқақтатқан бірегей туындыларын ере­к­ше атап өткім келеді. Ел анасы, ұлт тәр­биесінің жанашыры ретінде құн­ды­лық­­тарымызды қастерлеуге, қазақ қыз­дары­на парасат пен тәрбие нәрін сіңіруге зор үлес қосып келеді, – деді А.Балаева.

«Жұбан» поэтикалық драмасын Батыс Қазақстан облыстық Хадиша Бөкеева атындағы қазақ драма театры Ақұштап Бақтыгереева мен драматург Мәдина Омарованың сценарийі­мен әзірледі. Қойылымда ұлт тағдыры талқыға түскен қилы кезеңдерде «Мен қазақпын!» деп жар салған атпал ақын­ның ғұмыр жолы көрініс тапқан.

Ақын мерейтойы бұдан әрі жалғасын тауып, Ұлттық академиялық кітапханада Ж.Молдағалиев атындағы Батыс Қазақстан облыстық орталық әмбебап ғылыми кітапханасының ұйымдастыруымен «Алаштың Ақұштабы» тақырыбында әдеби кездесу өтті. Іс-шараға астаналық ақын-жазушылар және зиялы қауым өкілдері мен оқырмандар қатысты. Кеш жүргізушісі ақын Дәулеткерей Кәпұлы Ақұштап Бақтыгерееваның өмірі мен шығармашылығына тоқталып, пайымды пікір білдірді. Ақын Ғалым Жайлыбай, жазушы Алтыншаш Жағанова, сыншы Амангелді Кеңшілік, т.б құрметті қонақтар «Жайықтың ақ шағаласы» атанған ақынның поэзиядағы орны турасында қадау-қадау пікір білдірді. Кеш барысында «Менің Фаризам» кітабының тұсауы кесіліп, көпшілік оқырманға таратылды. Ақынның бұл кітабында қазақ поэзиясының падишасы Фариза Оңғарсынованың өмір жолы туралы сырлар, ой-толғамдар қамтылған.

Әдеби кештер легі мұнымен тоқта­май, Еуразия ұлттық университетінде «Кәусар» мәдени-танымдық бірлес­тігі­нің ұйымдастыруымен ақынның жас­тармен кездесуі өтті. Кеште студент жас­тар ақынмен дидарғайып болып, ел­дік рухтағы өлеңдеріне құлақ түрді. Сту­денттер ақынның өлеңдерін мәнерлеп оқып, сөзіне жазылған әндерді орындады.

– Жастар қайда бара жатыр екен, менің балапандарым, менің немере­лерім не ойлайды екен, соны көргім келген еді. Поэзияға қарлығаш құстай болып келіп едім, қазір 80-ге келіп, үлкен қалам иесі деп қабылдап жатқан елімнің құрметіне бөленіп отырмын. Осындай егемен елдің қызы болғаным үшін тағдырыма ризашылығымды білдіремін, – деді ақын өз сөзінде.