Облыстық кәсіпкерлер палатасының алаңында өткен агроөнеркәсіп кешені және тамақ өнеркәсібінің салалық кеңесі барысында ауыл шаруашылығы өндірушілеріне қатысты бірқатар өзекті мәселе көтеріліп, саладағы салмақты сауалдар ортаға тасталды.
«Сандықтау» ЖШС директоры Жамұл Мұсханов жалдамалы маусымдық қызметкерлердің әлеуметтік аударымдарына қатысты мәселеге назар аударды. Шынтуайтында, бұл жалғыз осы серіктестікке емес, көптеген ауыл тұрғынына қатысы бар жайт. Бүгінде жұмыс берушілер міндетті әлеуметтік медициналық сақтандыруға қызметкер еңбекақысының 3 пайызын, жалдамалы қызметкерлер үшін 2 пайызын төлейді. Алайда ауыл тұрғындары – негізінен ауыл шаруашылығымен айналысатын маусымдық жұмысшылар. Оларда жыл бойғы тұрақты табыс жоқ.
– Дала жұмысы көктемгі және күзгі маусымда жүргізілетіндіктен, жұмысшылар қысқы маусымда жұмыссыз қалады. Міне, осы кезеңде олар үшін әлеуметтік аударым жүргізілмейді. Салдарынан медициналық ұйымдар қызмет көрсетуден бас тартып жатады, – деп шағымданады аграршы.
Өңірлік палата директоры Ерқанат Мұсылманбек: «Атамекен» ұлттық кәсіпкерлер палатасына ауыл тұрғындарының әлеуметтік есептеулерін саралауға қатысты заңнамаға өзгерістер енгізу туралы ұсыныс жібереміз», деді. «Хамзе» шаруа қожалығының басшысы Ержан Биекенов элеватор мәселесін алға тартты.
– Ерейментау ауданының Еркіншілік ауылында элеватор жұмыс істемейді, сол себепті астық қабылдау жүргізілмейді. Элеватордың жағдайы мүшкіл, кәсіпорын иелерінен кері байланыс жоқ. Элеватор жұмысын жандандыруға қатысты жергілікті кәсіпкерлер ниет білдіріп те отыр, алайда жергілікті атқарушы органдар тарапынан түсіністік пен қолдау байқалмайды, – деді фермер.
Элеваторлар тарапынан жосықсыз қызмет көрсету мәселесін «Кенесары бидай» ЖШС директоры Қуанышбек Ибраев жалғастырды. Айтуынша, Бурабай ауданының аграршылары элеваторда астықты сақтауға тапсыру кезінде қиындықтарға тап болған. Себебі астықтың сапалық көрсеткіштерін төмендету фактілері бар. Жергілікті жерлерде мемлекеттік стандарттар қолданылмайды, сондықтан астық сапасы жасанды түрде төмендейді.
Фермерлерді толғандыратын негізгі мәселе – астықты сату. Облыста 6,6 млн тоннадан астам рекордтық астық жиналғанына қарамастан, көптеген аграршы өнімін сата алмай отыр.
– Диқандар мән-жайды түсінеді. Азық-түлік корпорациясына өнім беруге дайын. Алайда қолданыстағы тетіктер астықты тікелей сатып алуды көздемейді. Сонымен қатар шаруалардың несие міндеттемелері бар, – деді Өңірлік кеңес төрағасы Қуаныш Рақышев.
Облыс әкімінің орынбасары Мұрат Балпан барлық айтылған түйткілді мәселені жергілікті уәкілетті органдар назарға алатынын айтты. «Біздің тарапымыздан жан-жақты қолдау көрсетіледі. Бірақ ауыл шаруашылығы өндірушілері Азық-түлік корпорациясы алдындағы қолда бар міндеттемелерді мерзімінде орындауға тиіс», деді М.Балпан.
Көкшетау