Маңғыстау ауданының тұрғындарымен Шетпе ауылының Мәдениет үйінде өткен жиында ауданның дамуы мен өзекті мәселелері жан-жақты сөз болды. Аудан әкімі Ғалымжан Ниязов 2024 жылдың 9 айының қорытындысында ауданның әлеуметтік-экономикалық даму көрсеткіштеріне шолу жасап, атқарылған жұмыс туралы есеп берді.
Әкімнің айтуынша, Маңғыстау ауданының орталығында тұтас бір шағын аудан бой көтеріп келеді. Аталған ауданда 800 жер орынға инфрақұрылым толық жүргізілді. Жаңа ауданда биыл «Жайлы мектеп» жобасы аясында 600 орындық мектеп пен дәрігерлік амбулатория ғимараты салынып жатыр. Одан бөлек, мұнда салуға жоспарланған 600 орындық мәдениет үйі, спорт кешені, полиция, прокуратура, сот, мұрағат, қорғаныс істері, оқушылар сарайы, әкімдік ғимараттары құрылыстарының жобалық-сметалық құжаттамалары дайындалу үстінде.
Мемлекет басшысының тапсырмасына сәйкес ауданда жаңа білім нысандарының құрылысы қарқынды жүргізіліп жатыр. Биыл Бекі ауылында алғаш рет 100 орындық мектеп ашылды.
Мәдениет, спорт саласында да бірқатар оң өзгеріс болды. Ауыл өнерпаздарын гастрольдік сапарларға тасымалдауға қолайлы, сыйымдылығы 13 адамдық жаңа автокөлік пайдалануға берілді. Сондай-ақ ауданның 12 ауылында ашық спорт, балалардың ойын, воркаут алаңдарын салу жұмыстары жүріп жатыр.
Маңғыстау ауданының негізгі әлеуметтік-экономикалық саласы – ауыл шаруашылығы. Қазір ауданда 578 шаруа қожалығы мен 531 мал шаруашылығы тіркелген. Аталған аудан облыс көлеміндегі түйе басының 40%-ын қамтиды, бұл жылына шамамен 20 мың тонна түйе сүтін өндіруге мүмкіндік береді. «Ауыл аманаты» жобасы аясында түйе сүтін өндіруді ұлғайту мақсатында 10 жоба ұсынылған. Сонымен қатар ауданда 3 инвестициялық жоба қолға алынған. Жоба құны 864 млн теңгені құрайтын «Карат» ЖШС бастамасымен ауызсу шығару цехының құрылысы жүргізіліп жатыр. Цех құрылысы аяқталғаннан кейін 35 адам тұрақты жұмыс орнымен қамтылады. Ал 2025 жылы «Caspiy Milk» ЖШС мен «Mangystau Milk» ЖШС түйе сүтінен ұнтақталған сүт өнімін өндіру орындарын іске қоспақ.
Кездесуде облыс әкімі Нұрдәулет Қилыбай аталған ауданға қарасты Онды ауылын республика деңгейінде ең үлгілі ауылға айналдыруды ұсынды.
«Халық жазушысы Әбіш Кекілбаев туған Онды ауылында кейінгі жылдары бірде-бір құқық бұзушылық тіркелмеген. Ауылда арақ-шарап сатылмайды. Мұнда бір мың түп жеміс ағашы егілген бақ бар. Сондықтан Ондыны Ақмола облысындағы Родина ауылы сияқты үлгілі ауыл қатарына қосуды көздеп отырмыз. Бүгінде ауылды көркейту мақсатында арнайы жоспар жасалып жатыр», деді Нұрдәулет Қилыбай.
Кездесу барысында жергілікті тұрғындар мектеп тапшылығы, атшабар алаңының салынуы, қоғамдық көлік қажеттілігі, карьерлер мен Қосбұлақ ауылының мәселелері туралы сұрақтар қойды. Сондай-ақ мал шаруашылығы, денсаулық сақтау, білім, спорт салаларын дамыту жөнінде де ұсыныстар айтылды. Бес сағатқа созылған кездесуде айтылған өтініштер мен қойылған сұрақтарға жауап берген облыс әкімі жауапты сала басшыларына түйткілді мәселелерді нақтылы шешуді тапсырды.
Кездесуден кейін облыс әкімі жеке мәселелерімен тіркелген аудан азаматтарын қабылдады.
Маңғыстау ауданы – жарқын, жүйелі жұмыстарды жақсы жолға қойған, мәселелерді тиянақты шешіп, тыңғылықты іс атқарып келе жатқан, озық ісімен үлгі аудан. Ауданда атқарылған нәтижелі істер мен жоспарланған шаруалар аз емес, олардың бірқатары жоғарыда айтылды. Бұл – бар қажыр-қайратын, білім-білігін ел игілігіне арнаған жанашыр жандардың табанды жұмысының жемісі.
Маңғыстау облысы