Биліктегі «Грузин арманы» партиясы ел президенті лауазымына бұрынғы футболшы Михаил Кавелашвилиді ұсынды. Бұл туралы билік партиясының құрметті төрағасы әрі негізін қалаушы Бидзина Иванишвили мәлімдеді, деп хабарлайды Egemen.kz.
Билік партиясының негізін қалаушы Бидзина Иванишвилидің айтуынша, Кавелашвили - грузин адамының ең жақсы бейнесі.
«Мен Михаил Кавелашвили Президент институтынан уақытша алынған абыройды толығымен қайтаратынына сенімдімін», деді ол.
Михаил Кавелашвили 1996 жылы ағылшындық «Манчестер Сити» клубында ойнаған. 2016 жылдан бері Грузия парламентінің депутаты, «Халық күші» партиясының депутаттар тобының жетекшісі, 26 қазанда өткен парламенттік сайлауда «Грузин арманы» партиясының тізімінде болған.
Грузияның қазіргі президенті Саломе Зурабишвили 2018 жылы азаматтардың тікелей дауыс беруі арқылы алты жылдық мерзімге сайланды. Оның мерзімі осы күзде аяқталады. Конституцияға енгізілген жаңа түзетулерге сәйкес, болашақ президентті 26 қазанда өтетін парламенттік сайлаудан кейін парламент депутаттары мен жергілікті билік өкілдерінен тұратын 300 сайлаушыдан тұратын алқа бес жылдық мерзімге сайлайды.