Көкшетауда Қопа көлі бойындағы жаңа жол бойында көлік қозғалысы және Застанционный шағын ауданындағы көпір ашылды, деп хабарлайды Egemen.kz.
Ақмола облысы әкімдігінің мәліметінше, ұзындығы 1,7 км Жағалау көшесінің жаңа учаскесі Кенесары көшесін Қан орталығына бұрылыспен жалғайды. Бүгінгі таңда екіжақты жарықтандыру орнатылып, тротуарлар мен велосипед жолдары, бағдаршамдар мен су бұру науалары жабдықталған.
Жоба облыс әкімдігі мен «Қазцинк» АҚ арасындағы мемлекеттік-жекеменшік әріптестік аясында жүзеге асырылып жатыр. Жол магистралі қаланың екі ауданы арасындағы қашықтықты едәуір қысқартады және облыс орталығының негізгі көшелеріндегі трафикті жеңілдетеді. Айта кетейік, жаңа жол небәрі үш айда салынған.
«Жолдың жаңа учаскесі қауіпсіздік, ыңғайлылық деңгейін арттырады және туристік әлеуетті дамытуға ынталандырады», деді облыс әкімі.
Сондай-ақ Марат Ахметжанов Уәлиханов көшесінен Застанционный шағын ауданына қарай темір жол арқылы өтетін жол өтпесіне дейінгі жолды реконструкциялаудың аяқталуын тексерді.
Мердігер ұйым су бұру науаларын төсеу, тротуарларды, жарықтандыру тіректерін, бағдаршамдар мен жаяу жүргіншілер қоршауларын орнату, сондай-ақ ӘЖ-110 кВ электр беру желілерін тарту бойынша жұмыстар жүргізген.