Туризм және спорт министрі Ербол Мырзабосыновтың қатысуымен Қазақстан ауыр атлетика федерациясының есеп беру конференциясы өтті, деп хабарлайды Egemen.kz.
Федерацияның алдағы кезеңдегі жоспарлары мен даму стратегиялары талқыланған іс-шарада Қазақстан ауыр атлетика федерациясының бас хатшысы Мадина Астамирова федерацияның атқарған жұмысы туралы есеп беріп, саладағы бірқатар маңызды жетістіктерді атап өтті.
Ведомствоның баспасөз қызметі мәлім еткендей, жиын барысында Қазақстан ауыр атлетика федерациясының президенті Жанат Түсіпбеков өз қызметін мерзімінен бұрын тоқтататынын мәлімдеп, федерация президенттігіне Гаджи Гаджиевтің кандидатурасын ұсынды. Облыс федерацияларының басшылары және спорт қауымдастығы Г.Гаджиевтің кандидатурасын бірауыздан қолдады.
Құраманың халықаралық ареналардағы жетістіктері спортшыларымыздың жоғары әлеуетін көрсететінін және ел ішінде спорттың осы түріне деген қызығушылықтың артқанын айтқан Ербол Мырзабосынов:
«Туризм және спорт министрлігі атынан Жанат Түсіпбековке елімізде ауыр атлетиканың дамуына қосқан үлесі үшін алғыс білдіремін, он жылдан астам уақытта біздің спортшылар талай жетістіктерге қол жеткізді. Сондай-ақ федерацияның президенті болып сайланған Гаджи Гаджиевтің алдағы жұмысына сәттілік тілеймін. Ауыр атлетика спортшыларын жан-жақты қолдау дәстүрі жалғасатынына сенімдімін және бірлескен күш-жігермен жаңа биіктерге жетеміз», деп атап өтті.