Туристік фирманың басшысы 2022 жылдың желтоқсанынан 2023 жылдың тамызына дейін 21 клиентті алдаған, деп хабарлайды Egemen.kz Жоғарғы Соттың баспасөз қызметіне сілтеме жасап.
Туристік қызмет көрсету, қаладағы кеңсе және клиенттік база бойынша тәжірибесі бар Қарағанды тұрғыны ЖШС құрып, оны басқарған.
Клиенттермен туристік қызмет көрсетуге шарт жасасып, жақын және алыс шетелдерге сапарға шығуға жолдама сатқан.
Осылайша, жәбірленушілермен жасалған шарттар бойынша ЖШС директоры олардың 24 млн теңгеден астам ақшасын жымқырған.
«2023 жылдың 4-10 тамызы аралығында отбасымен Түркияға демалуға ұшуға шешім қабылдаған Астана тұрғыны ЖШС шотына 2,5 млн теңге аударып, 5 адамға жолдама алған. Ақыры рейстері тіркелмегенін және брондалмағанын білген ол Қарағандыға барып, ЖШС директорымен кездескен. Директор ақшаны қайтаруға уәде берген, бірақ тек 380 мың теңгесін қайтарған. ЖШС-ден оның пайдасына 2,2 млн теңге өндіру туралы бекітілген медиациялық келісімге қарамастан, оған қатысты азаматтық талап қоюды толық көлемде қанағаттандыруды талап еткен. Сотталушының алаяқтық бойынша кінәсі қылмыстық іс материалдарымен, жәбірленушілердің, куәлардың айғақтарымен, ақша аударылғаны туралы мәліметтермен, туроператорлардың жауаптарымен дәлелденді», делінген хабарламада.
Прокурор сотталушыны 6 жылға бас бостандығынан, 5 жылға белгілі бір қызметпен айналысу құқығынан айыруды сұраған. Ал жәбірленушілер қатаң жаза қолдануды талап еткен.
Сотталушы кінәсін мойындамай, өзін ақтауды сұраған.
Қылмыстық кодекстің 190-бабының 3-бөлігінің санкциясында мүлкі тәркіленіп, белгілі бір лауазымды атқару немесе белгілі бір қызметпен айналысу құқығынан 6 жылға дейінгі мерзімге айыра отырып немесе онсыз 3 жылдан 7 жылға дейін шектеу немесе бас бостандығынан айыру жазасы қарастырылған.Қарағанды қаласы, Қазыбек би аудандық соты алаяқтық жасады деп айыпталған сотталушыға қатысты қылмыстық істі қарап (ҚК-нің 190-бабының 3-бөлігі, 3,4-тармақтары), асырауында қарт ата-анасының болуын және бұрын соттылығының жоқтығын мойындады, ауырлататын мән-жайлар анықталмаған.
«Сотталушы 4 жыл 6 айға бас бостандығынан, 3 жылға туристік қызметпен айналысу құқығынан айырылды. Жәбірленушілердің азаматтық талап қоюлары қанағаттандырылды», делінген хабарламада.
Соттың үкімі заңды күшіне енген жоқ.