Алматыда «Birlik» ансамблі өнер көрсетті

Концерттік бағдарламада Қазақстан, Ресей, Өзбекстан және Татарстанның танымал хореограф­­­тарының қойылымдары ұсы­­­нылды. Жаңадан құрылған жас шы­ғар­ма­шылық ұжымның Алма­­тыдағы алғашқы концертін Мәдениет және ақпарат министрі Аида Балаева, сондай-ақ мәдениет, өнер және қоғам қайраткерлері тамашалады.

Белгілі өнер шеберлері мен жас таланттар жаппай және жеке хореографиялық композиция­лар, аспаптық және вокалдық нөмір­лерді орындады. Алматылық тал­ғампаз көрермен алдында шабытпен орындалған «Күй шашу» биі, халық әндерінен попурри, ұйғыр, корей, татар билері және басқа да сахналық қойылымдардан заманауи ізденіс іздері танылып, тамашалаған қауымды тәнті етті.

Іс-шараға Роза Бағланова атын­дағы «Қазақконцерт» мемлекет­тік академиялық концерттік ұйы­мының «Астана сазы» қазақ мемлекеттік фольклорлық ансамблі, Құрманғазы атындағы Қазақ ұлттық консерваториясы, Республикалық мемлекеттік академиялық корей музыкалық комедия театры, А.Жұбанов атын­дағы музыка мектебінің талантты оқушылары, П.Чайковский атындағы Алматы музыкалық кол­леджінің «Достлуқ» ұйғыр ха­лық аспаптар ансамблі, «Рухсара» би ұжымы, «Нава» ансамблі және «Бахар» кавказ би ансамблі қатысты.

– Бұл – ұлттар мен мемлекеттер арасындағы мәдениетаралық диалогтің үлгісі. Бейбітшілік пен мәдени дипломатияның туын көтерген ансамбль Орталық Азияның ғана емес, күллі әлемнің бірлігі үшін үн қатады. Шығармашылық ұжымның құрамында әртүрлі ұлт­тың талантты ұл-қыздары өнер көр­сетеді. Негізінен хореография академиясының түлектері жұмыс істейтін «Birlik» ансамблінің құрыл­ғанына бір жыл ғана болса да, осы уақыт аралығында ол Түркия, Ресей, Түрікменстан көрермен­де­рі­нің ал­дында табысты өнер көрсетті. Ансамбль құрамында өзге әртістен бөлек, 24 биші бар. Биыл алғаш рет Еуропаға сапар шегіп, Париж төрінде концерт беруді жоспарлап отырмыз, – дейді «Birlik» ансамблінің көркемдік жетекшісі әрі бишісі Анель Марабаева.

Концерттің басты мақсаты – көрермендерді әртүрлі этностар­дың би, ән және музыкалық шығар­ма­ларын қамтитын еліміздің бай ұлттық өнерімен таныстыру. Кон­церт еліміздің бірлігі мен мәдени әртүр­лілігін көрсететін, келісім идея­ларын насихаттауға шақыратын шығармашылық алаңға айналды.

Айта кетейік, «Birlik» ансамблі 2024 жылдың 1 наурызында құрыл­ды. Бұл – Қазақстан мен ТМД-дағы алғашқы көпұлтты ән мен би ансамблі. Ұжымның бірегей репертуары қазақ халқының тарихымен және тәуелсіз Қазақстанның қалыптасуымен тығыз байланысты этностардың музыкалық мұрасы мен өнерін қамтиды.

Елдің ынтымағын дә­ріп­­теп, әр ұлттың өнері мен мә­дениетін өрістетуді мақсат еткен «Birlik» ансамблінің құрылғанына жылға жуық уақыт өтсе де, ұжым мүшелері осы концерт арқылы қысқа мер­зім ішінде репертуар қорын толық­ты­ру­да талмай еңбек еткенін танытты. Концерт соңында Мәдениет және ақпарат министрлігінің атынан шығармашылық ұжымға ықылас гүлі тарту етілді.

АЛМАТЫ