Ораза айт мерекесі күні Шымкентте өткен «ДәмДәсTour» фестивалінде ең үлкен самса пісірілді. Бұл – елімізде алғаш рет әзірленген салмағы 24 кило тартатын тандыр самса. Дәл осындай самса бұрын-соңды болмағанын Қазақстан рекордтар кітабының ресми өкілі Бақытжан Сәбитұлы да растады. Сарапшы тағам дайындаудан рекорд жасаған Шымкент шын мәнінде еліміздің гастрономиялық астанасы екенін мойындады.
Рекорд авторы – Немат Нархожаев. «Камал ата» дәмханасының бас аспазы. Оның сөзінше мұндай самса пісіру оңай емес, сол үшін екі аптадай дайындалыпты. Дегенмен оның кәдімгі самсадан еш айырмашылығы жоқ екенін айтады. Қамыры да, ішіндегі қоспасы да бірдей. Тек көлемі ғана үлкен. Аспаз бірінші кезекте үйінде пісіріп көрген. Онысы 17 кило шыққан. Ал фестивальда, жоғарыда айтылғандай 24 кило етіп пісірді.
Жалпы, «ДәмДәсTour» фестивалі Шымкентте 2022 жылдан бері өтіп келеді. Іс-шара қала тұрғындары мен қонақтарына ерекше ұнап қалғандықтан, жергілікті әкімдік оны жыл сайын ұйымдастыруды ұйғарған. Мұндағы мақсат – шаһардың бұрыннан келе жатқан дәстүрлі тағамдары мен қонақжайлылығын насихаттап, елге туристер тарту. Шымқала өзінің бай асханасымен танымал. Оны мұндай дәрежеге көтерген оңтүстік өлкедегі түрлі мәдениеттердің бір-бірімен тоғысуы. Әрі мол дастарқан қазақ халқының кең пейілі мен дарқан көңілінің бір көрінісі іспетті.
Фестивальда қаланың елуден астам дәмханасы мен тамақ индустриясындағы кәсіпорындары қатысып, өз өнімдерін келушілер назарына ұсынды. Сондай-ақ жергілікті қолөнершілер де өз бұйымдарын қонақтарға таныстырды. Сонымен бірге мереке аясында мотоспорттық іс-шара ұйымдастырылды. Республиканың әр өңірінен және Қырғызстан, Өзбекстан, Тәжікстан елдерінен келген мотобайкерлер өздерінің ерекше қызықты мотошоуы мен мотошеруін өткізді.
Фестиваль отшашу мен эстрада жұлдыздарының мерекелік концертіне ұласты.
ШЫМКЕНТ