Ән өнерінің жарық жұлдызы Бибігүл Төлегенова әр екі жыл сайын өз атында өтіп келе жатқан Халықаралық вокалистер байқауы – жеке атын шығаратын жарыс емес, отандық опера өнерінің ортақ игілігі екенін айтудан танбай келеді.
Әзірге бұл байқау Орталық Азиядағы классикалық өнердегі жалғыз жоба болғандықтан, Қазақстандағы конкурс алыс та жақын елдердің кәсіби опера мен концерттік камералық әншілерін жинап жүр. Әдеттегідей, биылғы байқау да жоғары деңгейде өтті. Классикалық өнердің қарлығаштары қанат қақты.
Бибігүл Төлегенованың ХІІІ Халықаралық вокалистер байқауында биылғы бас жүлде Ресейге кетті. Бұрнағы жылы Гран-приді бакулік Махир Тагизаде әкеткен еді.
Беделі биік Халықаралық вокалистер конкурсының жеңімпаздары Жамбыл атындағы Қазақ мемлекеттік филармо-ниясында марапатталды.
Опера өнерінің жеңімпазы атану үшін Қазақстан, Армения, Ресей, Өзбекстан, Қырғызстан, Моңғолия, Италия, Украинадан орындаушылар талант жарыстырды. Ақтық сынға өткен 17 әншінің өнерін әлемдік опера майталмандарынан құралған халықаралық қазылар алқасы бағалады.
Опера мерекесі іспетті байқауда қазылар алқасының төрайымы КСРО мен Қазақстанның халық әртісі, Социалистік Еңбек Ері Бибігүл Ахметқызы Төлегенова ұйымдастырушыларға, демеушілер мен барша қатысушыларға шынайы алғысын білдіріп, жеңімпаздың атын өзі жариялады. Биылғы бас жүлдені (Гран-при) Мәскеуден келген Софья Сакания иеленді.
Жиырма жастағы әнші Бақытжан Байқадамұлының «Сүйген сәулем» әнін нақышына келтіре орындауымен көрермендер ықыласына бөленді.
«Бәсекенің бәсі жоғары болды. Бибігүл Ахметқызы – аңыз адам. Оны өз көзіммен көрудің өзі – үлкен бақыт. Әлбетте, оған қоса халықаралық байқаулар орасан тәжірибе, оркестрмен жұмыс істеу, бұрын білмеген әсерлер үлкен мектептен өткендей әсер қалдырды», деді Софья.
Халықаралық опера өнерінің додасындағы І орынға Әлихан Бейсеков (Алматы), Екатерина Свиридова (Мәскеу) мен Мунхтувшин Хоролгорав (Ұлан-Батыр) лайықты деп танылды.
АЛМАТЫ