Халықтың арыз-шағымына, жағдайына атүсті қарайтын басшы атқаратын қызметіне лайықты ма? Осы сауал Атырау облыстық тәртіптік кеңес мүшелерін біраз толғандырған сыңайлы. Нақты дерекке сүйенер болсақ, Жылыой аудандық құрылыс, сәулет және қала құрылысы бөлімінің басшысы Б.Сатиевке тұрғындардан жер телімін сұраған 63 арыз түскенімен, оларға ол уақтылы жауап бермей қойған. Ол өзінің бұл әрекетін жаңа алаңдардың дайын еместігімен, тиісті құжаттардың толық болмауымен түсіндіруге тырысып бақты. Алайда, қарауындағы қызметкерлер оның жауабына кереғар себептерді алға тартты.
Сондықтан үш айдай бұрын аталған лауазымға тағайындалған шенеуніктің бұл әрекетіне тәртіптік кеңес мүшелері бейжай қарай алмады. Өйткені, ол мемлекеттік қызметшілердің Ар-намыс кодексінің талаптары мен жеке және заңды тұлғалардың арыз-өтініштерін қараудың тәртібін бұзып, сыбайлас жемқорлыққа жағдай туғызатын құқық бұзушылық жасап отыр. Осыған байланысты Жылыой аудандық құрылыс, сәулет және қала құрылысы бөлімінің басшысы Б.Сатиевке «лауазымын төмендету» түріндегі тәртіптік жаза қолдану ұйғарылды.
Жолдасбек ШӨПЕҒҰЛ,
«Егемен Қазақстан».
Атырау облысы.