Ұлттық қауіпсіздік комитеті сыбайлас жемқорлыққа қарсы күреске арналған деректі фильмде Шығыс Қазақстан облысы әкімінің бұрынғы бірінші орынбасары әрі Өскемен қаласының экс-әкімі Жақсылық Омарға қатысты қылмыстық істің мән-жайын жария етті, деп хабарлайды Egemen.kz.
Ведомство мәліметінше, 2025 жылдың соңында Шығыс Қазақстан облысы бойынша ҰҚК департаментіне шенеуніктің қарамағындағы қызметкерлер мен ведомстволық ұйымдардан жүйелі түрде ақша талап етіп жүргені туралы ақпарат түскен.
Тергеу барысында ақша талап етілген адамдардың шеңбері анықталған. ҰҚК дерегіне сәйкес, Жақсылық Омар қызметтік өсуге ықпал етуді уәде етіп, ал талапты орындамағандарға жұмыстан шығару немесе лауазымын төмендету қаупін төндірген.
Комитет өкілдерінің айтуынша, 4 ақпанда ақша беру тізбегін құжаттау және қаражатты алу схемасын анықтау мақсатында ақшаның бір бөлігі арнайы бақылаумен тапсырылған.
Жарияланған бейнематериалда Өскемендегі шенеуніктің жеке үйінде жүргізілген тінту кадрлары көрсетілді. ҰҚК мәліметінше, тінту барысында қаражат тәркіленген.
Сондай-ақ ведомство алғашқы жауап алу кезінде Жақсылық Омардың кінәсін мойындағанын хабарлады. Тергеу барысында оған қатысты Қылмыстық кодекстің 190-бабы 3-бөлігі бойынша алаяқтық фактісі де қосымша анықталған.
Нәтижесінде сот бұрынғы шенеунікті ірі көлемде пара алғаны және алаяқтық жасағаны үшін кінәлі деп танып, 6 жылға бас бостандығынан айырды.
Айта кетейік, сот процесінде іс бойынша екі эпизод қаралды. Жақсылық Омар өз кінәсін мойындап, өзіне айыппұл тағайындауды сұрағанымен, сот оны 6 жылға бас бостандығынан айыру туралы шешім шығарды. Кейін апелляциялық шағым берілгенімен, үкім өзгеріссіз қалдырылды.
Еске салайық, бұған дейін Шығыс Қазақстан облысы прокуратурасы Жақсылық Омарға қатысты сот үкіміне пікір білдіргенін хабарлаған едік.