АСТАНА. 5 наурыз. Футболдан Нидерланды құрамасының бұрынғы ойыншысы, әйгілі шабуылшы Патрик Клюйверт Кюрасао ұлттық командасының бас жаттықтырушысы болып тағайындалды. Бұл туралы eurosport.ru хабарлады.
Клюйверт үшін бұл бас жаттықтырушы ретіндегі алғашқы тәжірибе. Бұған дейін ол Нидерланды ұлттық құрамасының бас бапкері Луи ван Галдың көмекшісі қызметін атқарып келді. Кюрасао футболының басшылары бүгін Патрик Клюйвертті футболшылармен ресми түрде таныстырмақ.
Жалпы, бұл ел ФИФА рейтингінде 209 команданың арасында 160-орында келеді. Кариб теңізінде орналасқан арал мемлекеттің Клюйвертке қойып отырған басты талабы 2018 жылғы әлем чемпионатына жолдама алу. Жуырда Кюрасао Монсеррата құрамасымен ойнайды. Егер бұл ойында жеңіске жетер болса, Клюйверттің шәкірттері келесі тартыста Кубамен күш сынаспақ.
38 жастағы нидерландылық маман жаттықтырушылық қызметін 2010 жылы бастады. ««Барселонаны» жаттықтырсам деймін. Әзірге бұл арман ғана. Сол арманның жүзеге асқанын қалаймын. Үмітім зор. Егер «Реал Мадридтен» де ұсыныс түсіп жатса, қарсы болмас едім», дейді даңқты футболшы.
Патрик Клюйверттің футболшы ретіндегі жұлдызды шағы 1998-2004 жылдары «Барселона» сапында өткенін айта кетейік.
Еламан Қоңыр.
Дерек: eurosport.ru.
Сурет: armfootball.com