АЛМАТЫ. 25 тамыз. Екінші Дүниежүзілік соғыстың аяқталуының 70 жылдығына орай – 3 қыркүйекте Бейжіңде өтетін әскери шеруге 17 елден 1000 әскер қатысады. Бұл туралы синьхуа хабарлады.
Елдің Бас алаңында сарапшыларға әскери парадтың соңғы дайындықтары көрсетілді. Салтанат күні барлығы 10 000 жауынгер, 500 ауыр техника, 200 әскери ұшақ Қытай Халық Республикасының әскери қуатын байқататын болады.
Сондай-ақ, Әскери салтанатты шеруде қытайлық жауынгерлермен бірге Бас алаңнан Ресей мен Қазақстанның, Моңғолияның әскерлері сап түзеп өтеді.
Шеру өтетін Тяньаньмень алаңындағы Халық Батырларының Ескерткіші жанына Ұлы Қытай қорғанының көшірмесі тұрғызылды. Ол үшін елдің ең танымал дизайнерлері жұмыс істеді. Қонақтар жайғасатын мінбе де дайын, әрбір қонақ үшін орындық жанынан бір құты су мен жаңбырдан қорғайтын сырт киім ілініп қойылды. Құлпырып хош иісті жұпар шашқан 3000-нан астам гүл шоқтары алаңға әр береді.
Алаңның қақ ортасына биіктігі он метрлік үлкен телеэкран қойылды.
Талғат Сүйінбай.
Дерек, сурет: синьхуа.