Кеше Астанаға екі күндік сапармен Жапонияның Сыртқы істер министрі Кацуя Окада келді. Сапардың алғашқы күні К. Окада Мемлекеттік хатшы – Сыртқы істер министрі Қанат Саудабаевпен кездесті.
Басқосу кезінде тараптар екі ел арасындағы саяси, сауда-экономикалық байланыстарды әңгіме өзегіне айналдырды. Кездесу кезінде Қанат Саудабаев Нагасаки қаласына алғашқы атом бомбасы тасталғанына 65 жыл толып отырғанын, қазақ жері де мұндай қасіреттен айналып өтпегенін, қазақ баласы аталған зұлматтың зардабын 40 жыл бойы басынан өткергенін тілге тиек етті.
“Жапония бірінші күннен бастап Қазақстанға үлкен қолдау көрсетіп, ядролық сынақтан зардап шеккен жандарға көмек қолын созып келеді. Бүгінде Қазақстан әлемді ядролық қарудан азат ету бағытында үлкен бастамалар көтеруде. Бұл ретте Мемлекет басшысы Нұрсұлтан Назарбаевтың бастамасымен 29 тамыздың “Дүниежүзілік ядролық қарудан бас тарту күні” деп жарияланғанын айтсақ та жеткілікті. Ал ядролық қарудан бас тарту – бұл Қазақстан мен Жапонияның ортақ ұстанымы. Бұл ретте сіздің сапарыңыз Қазақстан мен Жапония арасындағы әріптестікті одан әрі дамытуға жол ашады деп ойлаймыз”, деді Қанат Саудабаев өз сөзінде.
Ал Жапония Сыртқы істер министрі Кацуя Окада Қазақстанның Мемлекеттік хатшысы – Сыртқы істер министрі Қанат Саудабаевтың 1945 жылғы 9 тамызда Нагасаки қаласында орын алған зұлматты, жапон халқының басынан кешкен қасіретін еске алып отырғаны үшін ризашылығын жеткізді. “Осы орайда біз өзіміздің барлық күш-жігерімізді ядролық қаруға қарсы күрес жүргізуге жұмсауымыз қажет”, деді К. Окада өз кезегінде.
Сондай-ақ, К. Окада 15 жыл бұрын Қазақстанға Жапония Парламентінің депутаты болып жүрген кезінде еліміздің сол кездегі астанасы – Алматыға келгендігін, биыл қазақ жеріне екінші рет жолы түсіп отырғанын жеткізді.
Ләйла ЕДІЛҚЫЗЫ.