“Даму” кәсіпкерлікті қолдау қоры аудандардағы, ауылдардағы шағын және орта бизнес субъектілеріне бухгалтерлік қызметті жүргізу және кеңес беру мақсатында осындай жаңа бағдарлама ұсынып отыр. Шыны керек, шағын және орта бизнес субъектілері, соның ішінде, ауылдық жерлердегі кәсіпкерлердің басым бөлігі бухгалтерлік есепті мүлде жүргізбейді десе де болады. Себебі, олардың жұмысқа маман есепші алатындай мүмкіндігі жоқ, ауылдық жерде жоғары дәрежелі есепші табу да оңай емес. Сондықтан олардың арасында салық көлемін дұрыс есептей алмаушылық, салық есебін уақтылы тапсырмаушылық және оның режімін дұрыс таңдай алмаушылық та жиі кездеседі.
Осыны ескерген “Даму” кәсіпкерлікті қолдау қоры осы бағдарламаны ұсыну арқылы ауылдық жерлердегі кәсіпкерлердің қаржы, бухгалтерлік есеп және салық мәселелері бойынша білікті мамандардан көмек алуына жағдай туғызбақшы. Жаңа бағдарлама бастапқыда Әйтеке би және Мәртөк аудандарында жүзеге асырылады. Қазір осы екі ауданда кәсіпкерлерге қызмет көрсету және кеңес беру орталықтары жұмыс істейді. Мұндай болашағы баянды бағдарламаның операторы – бухгалтерлік қызмет саласында өзіндік қолтаңбасы қалыптасқан “Есеп” қоғамдық бірлестігі. Орталықтар әзірге ақысыз қызмет көрсетеді, болашақта ол ақылы болуы мүмкін.
Сатыбалды СӘУІРБАЙ. Ақтөбе облысы.