Қасым-Жомарт Тоқаевтың төрағалығымен кеше болған Сенат бюросының отырысы палата басшысының сөзімен ашылды, онда Төраға Парламент сессиясының ашылуы кезінде депутаттардың алдына Елбасы қойған міндеттерге тоқталды.
Қ.Тоқаев Сенаттың негізгі қызметі еліміздің 2020 жылдарға арналған Стратегиялық жоспарын заңнамалық тұрғыда қамтамасыз ету екенін атап өтті. Төраға сессияны ашқан кезде Президент Н.Назарбаев дамудың басым бағыттарын жүзеге асыру мақсатында отыздан астам заң жобаларын Парламенттің осы сессиясында қарауға және қабылдауға тапсырма берді, деді және қазіргі кезде осы заң жобаларының жиырмаға жуығы Парламентте екенін айтты.
Заң шығару жұмыстарының маңызды бөлігі, Қ.Тоқаевтың айтуынша, республикалық бюджетке өзгерістер енгізу болып табылады. Үш жылдық бюджетке өзгерістер қазан-қараша айларында енгізілетін болады, деп атап өтті Төраға.
Палата Төрағасы сондай-ақ даму бағдарламасына арналған бюджет қаржысының тиімді және үнемді орындалуына парламенттік бақылауды күшейту қажеттігі туралы да атап өтті.
Бюро отырысында Парламент Мәжілісі мақұлдаған заң жобалары палата комитеттері арасында бөлініп берілді. Атап айтқанда, “Уақытша әкелу туралы конвенцияны ратификациялау туралы” және “Қазақстан Республикасы мен Еуропа Инвестициялық банкі арасындағы Еуропа Инвестициялық банкінің Қазақстан Республикасындағы қызметін реттейтін негіздемелік келісімді ратификациялау туралы” заң жобалары Қаржы және бюджет комитетіне берілді.
Сондай-ақ 23 қыркүйекте болатын палатаның кезекті отырысының күн тәртібін қалыптастыру туралы комитеттердің ұсыныстары қаралды. Алдағы палата отырысында “Қазақстан Республикасының кейбір заңнамалық актілеріне азаматтық заңнаманы жетілдіру мәселелері бойынша өзгерістер мен толықтырулар енгізу туралы” және “Қазақстан Республикасының кейбір заңнамалық актілеріне көлік мәселелері бойынша өзгерістер мен толықтырулар енгізу туралы” заң жобалары бірінші оқылымда қаралатын болды, деп хабарлады Парламент Сенатының баспасөз қызметі.