...ҚОҒАМДЫҚ ТЫҢДАУ ӨТТІ
Қазіргі кезде Талғар, Жамбыл, Іле, Қарасай, тағы басқа аудандар тұрғындары “көгілдір отынды” тұрмыстарына берік енгізді. Ал кеше Талдықорған аймағына газ құбырын тарту жөнінде облыстық энергетика және коммуналдық шаруашылық басқармасы мен КАТЭК ғылыми-жобалау компаниясы бірлесіп, қоғамдық тыңдау өткізді, техника-экономикалық жоба үлгісін көпшілік назарына ұсынды.
Аталған жобаның құны 17,2 млрд.теңге болса, газ құбыры Кербұлақ, Көксу аудандары арқылы жол бойындағы елді мекендерді қамтып, Талдықорғанға жеткізілмек.
Күмісжан БАЙЖАН. Алматы облысы.
* * *
...ШӘМШІ ӘНДЕРІНЕН ШАШУ ШАШЫЛДЫ
Мәдина Ералиева атындағы мәдениет үйінде есімі елімізге әйгілі композитор Шәмші Қалдаяқовтың туғанына 80 жыл толуына орай “Бақыт құшағында” атты музыкалық кеш өтіп, Шәмші әндерінен көпшілікке шашу шашылды.
Әсерлі ән кешіне белгілі әншілермен бірге жас әншілер де қатысып, атақты композитордың туындыларымен көрермендердің құлақ құрышын қандырды. Кеш барысында мәдениет үйі көркемөнерпаздары мен “Дарын” ән үйірмесінің балауса әншілері Шәмші Қалдаяқовтың халыққа танымал, көпшілік сүйіп тыңдайтын әндерін әуелете шырқап, көпшілік құрметіне бөленді.
Еркін ӘБІЛ. Қызылорда.
* * *
...ЖЕҢІМПАЗДАР АНЫҚТАЛДЫ
Көкшетауда “Қазақстанның үздік тауарлары” дәстүрлі байқау көрмесі ұйымдастырылды. Оған барлық аудандар мен облыстық деңгейдегі екі қаланың іріктеу бәсекесінде озып шыққан бетке ұстар кәсіпорындары қатысты.
Қазылар алқасы екі күндік талқылаудан кейін “Үздік азық-түлік тауарлары”, “Өндірістік мақсаттағы үздік тауарлар” және “Тұрғындарға арналған тұтыну тауарлары” санатындағы 10 кәсіпорынды таңдаулылар тұғырына көтерді. Олардың арасында Астрахан ауданындағы “Колутон-95” ЖШС, Жақсы ауданындағы “Айбат” ЖШС, Зеренді ауданындағы Айдабол спирт зауыты, т.б.өндіріс орындары бар.
Бақберген АМАЛБЕК. Ақмола облысы.
* * *
...ӘУБӘКІРОВТІҢ СУРЕТ КӨРМЕСІ АШЫЛДЫ
Алдияр Әубәкіров – Шығыс өңіріне есімі жақсы таныс, мемлекеттік қызметте жауапты адам болса да өлең жазып, сурет салатын, белгілі қылқалам иелерінің тамаша суреттерін жинайтын азамат. Оның 300-ден астам суреті бар.
Кеше А.Әубәкіровтің соңғы жиырма шақты жылда жинаған суреттері облыстық А.Пушкин атындағы кітапханаға көрмеге қойылды. Оны тамашалап жатқандар аз емес.
Оңдасын ЕЛУБАЙ. Өскемен.