Пески ауылының оқушылары мектеп үйінің тарлығынан екі ауысымда оқып келді. Спорт залының болмауы дене қимылымен шынығуға қалыпты мүмкіндік бермейтін. Одақ ыдырар алдында жаңа мектеп үйінің іргетасы қаланып, одан әрі жалғас таппай қалды. Пескиліктердің көптен бергі арманы биыл ғана орындалды. Енді олар үшін қыркүйек айы ерекше. 800-ге тарта тұрғынның өтініш-тілектеріне орай болашақ білім ошағының жобасы “100 мектеп, 100 аурухана” бағдарламасына енгізіліп, республикалық бюджеттен жарты миллиард теңге қаржы бөлінді. 250 орынды 2 қабатты білім отауы небәрі бір жылдың ішінде бой көтеріп, ауылдың төріне орналасты. Оның ашылу салтанатына облыс әкімі Серік Біләлов арнайы келіп, мектеп ұжымына “ГАЗель” көлігін тарту етті. Заманауи құрал-жабдықтар орнатылған сыныптарды аралап көрді. Оқу-әдістемелік, мультимедиялық кабинеттер, спорт және акт залдары кең де жарық бөлмелерде орналасқан. 50 балаға лайықталған шағын орталық жұмыс істейді. Серік Сұлтанғазыұлы аудан орталығы – Новоишим кентінде болып, ипотекалық үйдің қоныс тойына қатысты. Түрлі салаларда еңбек етіп жүрген 12 мемлекеттік қызметшіге жайлы пәтерлердің кілтін табыс етті.
Ғабит Мүсірепов – өңірдегі ең ірі астықты аудан. Жылда бітік егін өсіретін аймаққа жаздың қуаңшылығы өте-мөте әсер еткені бірден байқалады. Соған қарамастан, озық тәсілдерді, әсіресе, ылғал сақтайтын технологияларды қолданудың арқасында орташа өнім алынуда. С.Біләлов егіс танаптарын аралап, элеваторлардың астық қабылдау жайымен танысты. Диқандармен әңгіме барысында нан және нан өнімдері бағасын негізсіз өсіруге жол берілмейтінін, жер-жерлерде меморандумға қол қойылып жатқанын, тұрақтандыру қорына 600 мың тонна астық құю солтүстікқазақстандықтар үшін басты міндет екенін, мұның өзі азық-түлік қауіпсіздігін қамтамасыз етуге қосылатын сүбелі үлес болып табылатынын қадай айтып, жауапты науқанды қыркүйектің 10-ына дейін аяқтауды тапсырды. Ауданда жарыс көшін “Тұқым” ЖШС бастап келеді. Серіктестік басшысы Мекібай Кәрімовтің сөзіне қарағанда, науқан бел ортадан ауған. Өнімділік 18 центнерге жетеғабыл. Округ тұрғындарына жемшөп жеткізілгенін, картоп қазу жұмысы қоса атқарылып жатқанын мәлімдеді. Оның ізін өкшелей келе жатқан “Возвышен-СК” 11 мың гектар алқаптың 80 пайызын бастырып үлгіріпті. Серіктестік жетекшісі Әбдірахым Нұқаев қолда бар техниканың ораққа түгел жұмылдырылғанын, келер жыл үшін сапалы тұқым құйып алынғанын жеткізді.“Бірлік-Қазақстан”, “Артабақ” шаруа қожалықтары егін жинауды аяқтапты. Самат Тасмағанбетовтің жетекшілігіндегі “Вест” шаруашылығы соңғы дестелерді бастыруға қызу кіріскен. Новоишимдегі “Әліби-Астық” ЖШС-не қарасты элеватор биыл іске қосылыпты. Сыйымдылығы 20 мың тоннаны құрайды. Астық қабылдау пункті қарбаласқа толы.
–Бар күш-жігер 622 мың гектар алқаптың астығын ысырапсыз жинап алуға жұмылдырылған. Жаздың аптап ыстығы мен қуаңшылығы шығымдылыққа кері әсер етті. Алайда, гектар түсімділігі 8 центнерден айналса да, сапасы өте жоғары. Мәселен, балауыз 26-28-ден кем емес. Қолдағы астықтың 80 пайызы орылып, 76 пайызы бастырылды. Егін ерте піскендіктен, тікелей жинау әдісін қолданудамыз,–дейді аудан әкімі Марат Тасмағанбетов.
Өмір ЕСҚАЛИ,
Солтүстік Қазақстан облысы,
Ғ. Мүсірепов ауданы.