Белгілі жағдайларға байланысты елден кетіп, бір жарым жылдан бері шетте халықаралық іздеуде жүрген бұрынғы “Сеймар” компаниясының иесі һәм “Альянс Банк” АҚ директорлар кеңесінің төрағасы әрі банктің құрылтайшысы Марғұлан Сейсембаев жақында, атап айтқанда, 25 қазанда Қазақстанға өз еркімен қайтып оралды. Кеше Алматыдағы Ұлттық баспасөз клубында өткізген брифингінде ол өз басына түскен тауқыметті істердің салмағын азамат ретінде көтеріп алатындығын, осы орайда тек ақиқатқа және әділ сотқа жүгінетіндігін атап көрсетті. Сонымен бірге шетте жүрген кезінде өзіне байланысты жәйттерді бұра тартпаған, қисық та қыңыр сөзге ерік бермеген журналист қауымына рахмет айтуды да ұмытпады.
М.Сейсембаев елге Альянс Банк акционерлері мен менеджментіне қатысты қозғалған қылмыстық істі тергеу амалдарына көмектесу үшін оралғандығын мәлімдеді. Ол өзіне тағылған айып бойынша куәлік беруге және ақиқатты анықтауға көмектесуге әзір екендігін айтты. Сонымен қатар ол банк активтерін қалпына келтіру, біздің республиканың бизнес қауымдастығы алдында оның абырой-беделін көтеру жөнінде жұмыс жүргізуге де әзір.
Бұдан әрі М.Сейсембаев былай деді: “ Мен елге оралған соң маған қатысты қылмыстық іс қозғалу фактісін саяси мақсатта пайдаланып, мені Елбасының жүргізіп отырған саясатына қарсы қою үшін көптеген әрекеттер жасалды. Осы аз ғана уақыттың ішінде интернет-сайттарда мені Елбасына және құқық қорғау органдары мен сот жүйесіне қарсы қоюға бағытталған оншақты мақалалар жарық көрді. Сонымен бірге маған қатысты қылмыстық қудалау қазіргі билікті қаралауға, тіпті жала жабуға белсенді пайдаланылуда. Кейбір жарияланымдарда менің есімім Рахат Әлиев пен Мұхтар Әблязовтардың аттарымен қатар қойылуда. Осыған байланысты тағы да мәлімдегім келеді: менің оларға ешқандай қатысым жоқ және болған емес. Мен ешуақытта олардың саяси іс-әрекеті мен көзқарасын қолдаған емеспін, ешуақытта оппозицияда болған жоқпын, ел Президентіне адал болдым және алдағы уақытта да сол адалдығымды сақтап қала беремін”.
Осылай дей келе, М.Сейсембаев өзінің Елбасы саясатын қолдамауға ар-ұяты бармайтындығын айтты. Себебі, ол алыс ауылда көп балалы отбасынан шығып, жақсы білім алған, сонан соң Қазақстанда ірі бизнес құрылымын қалыптастыруға мүмкіндік алған. Енді ол бизнесмен және азамат ретінде өз келешегін Қазақстанның болашағымен байланыстыруға және бұдан кейін де ел игілігі үшін еселі еңбек етуге ниеттенген. Ол тергеу органдарының алдына өз еркімен келіп отыр. Демек, тергеудің объективті жүруіне көмектесу үшін қолдан келгеннің бәрін жасамақ.
Сөзінің соңын М.Сейсембаев: “Тергеу объективті әрі әділ жүреді деп үміттенемін. Осы жағдайды пайдаланып шетелде жасырынып жүргендердің барлығын елге оралуға, тергеуге көмек көрсетуге шақырамын. Олардың жауапкершіліктен қашып, Қазақстаннан тыс жерде жүруі, керісінше, өз жағдайларын одан әрмен қиындата беретінін ескерткім келеді” деп түйіндеді.
Қорғанбек АМАНЖОЛ.