Астанада өтетін Еуропадағы қауіпсіздік және ынтымақтастық ұйымының Саммиті қарсаңында “Саммит ТВ” телеарнасы ашылды.
Бұл күндері әлем назары Қазақстанға ауып отырғандықтан, елімізде болып жатқан жаңалықтар ретін дүйім халық осы арнадан біле алады. Кеше түнгі сағат 12-ден басталып, 3 желтоқсанға дейін эфирге шығатын “Саммит ТВ” “Хабар” агенттігінің спутниктік жүйеде ақпарат тарататын “Caspіonet” арнасы арқылы көрсетіледі.
Еуропадағы қауіпсіздік және ынтымақтастық ұйымы Саммитіне келген қонақтар, олардың ой-пікірлері, қабылданған шешімдер жайлы толық ақпаратты осы телеарна 24 сағат бойы ағылшын тілінде таратып отыратын болды. Дайджест ретінде жүретін 10 минөттік жаңалықтар сағат сайын жаңаланып отырса, күн сайын кешкі сағат 10-да эфирге арнайы жаңалықтар бюллетені шығады. Оны Джоннотон Ньюэлл жүргізеді.
Жаңалықтардан бөлек, арнада сол күннің айтулы сұхбаттары да беріліп, құлақ құрышын қандырар қазақ классикасы мен эстрадалық әндер қойылады.
Осы арнадан өткен барлық ақпаратты көрермен қауым Онлайн режімінде “Caspіonet” сайтынан көре алады. 25 қарашадан 3 желтоқсанға дейін жұмыс істейтін, бүкіл оқиға мен жаңалықты жедел жеткізіп отыратын “Саммит ТВ” еліміздің имиджін қалыптастыруды мақсат етеді.
www.caspіonet.kz сайтының жаңартылған нұсқасы іске қосылды. Енді пайдаланушылар арнаны онлайн режімінде көре алады.