Кеше елордадағы “Риксос” қонақүйінде Үкімет басшысы Кәрім Мәсімовтің қатысуымен “Біртұтас экономикалық кеңістік – Қазақстанның жаңа мүмкіндіктері” атты дөңгелек үстел болып өтті. Онда БЭК төңірегіндегі сауалдар мен келісімдер сөз болып, Кеден одағы бойынша соңғы ақпараттар жарияланды.
Алдымен Үкімет басшысы Кәрім Мәсімов Кеден одағына шолу жасап өтті. Кәрім Мәсімовтен кейін сөз алған бірінші вице-премьер Ө.Шөкеев Кеден одағының жоғары органы Кеден одағы комиссиясы аясында арнайы сараптамалық кеңес құрылатындығын жеткізді. Бұл жөнінде әріптес елдермен келісілді, деді ол. Бірінші вице-премьердің айтуынша, сараптамалық кеңес құзыретіне КО құқықтық келісімдері базасындағы шешімдердің сәйкестігі жөніндегі мәселелер бойынша шаруашылық субъектілерінің өтініштерін қарау кіреді. Сонымен қатар ұйымдастырылған дөңгелек үстелге қатысып отырған кейбір бизнес-қауымдастық өкілдерінің аталған кеңеске мүше ретінде ұсынылатындығын атап өтті.
Кеден одағы аясында жүргізілген сауда-саттықтың 9 айдағы қорытындысы бойынша қазақстандық өнім экспорты Ресейге 48 пайызға артқан. Бұл көрсеткішке шикізат, өңдеу тауарлары есебінен қол жеткізілген. Ал Беларусь еліне шығарылған мұнай өнімдері, аллюминий есебінен экспорт екі есеге өскен көрінеді.
Қазақстан, Беларусь, Ресей елдерін біріктіретін біртұтас экономикалық кеңістіктің құқықтық базасы 17 негіз қалаушы келісімнен тұрады. Олар тауарлар қозғалысын, қызмет көрсету мен капиталды реттеп отырады. Келісімдер топтамасындағы 4 құжат осы уақытқа дейін әбден пысықталып, келісілді. Елбасы тапсырмасына сәйкес 20 құжаттың орнына келген 17 келісімнің 4-еуі БЭК-ке мүше мемлекеттер арасындағы қызмет көрсету, сауда және инвестиция туралы келісім, өнеркәсіптерге субсидия берудің ортақ ережелері, келісілген макроэкономикалық саясат жүргізу, темір жол көлігі саласындағы тарифтік саясатты қоса алғанда табиғи монополия қызметіне қолжетімділікті реттеу туралы келісім, үш ел ішінде еңбек етуші мигранттар мен олардың отбасы мүшелеріне құқықтық мәртебе беру туралы келісімдерге қол қойылды. Жалпы 17 құжатты 5 бағытқа бөлуге болады. Бұлар – келісілген экономикалық саясат, капиталдың еркін қозғалысы, қызмет көрсету түрлерінің еркін ауысып отыруы, БЭК-ке мүше мемлекеттердің инфрақұрылымына тең қолжетімділік.
Дөңгелек үстел барысында Премьер-Министр “Бизнестің жол картасы -2020” аясында кәсіпорындарды сауықтыруға байланысты жаңа бөлім ашылатынын айтты. Бүгін бірыңғай үйлестіру кеңесінің отырысы өтті. Онда біз кәсіпорындарды сауықтыратын жаңа бағдарлама болуы тиіс деген тұжырымдамалық шешім қабылдадық, деді ол. Үкімет басшысының айтуынша, жаңа бағдарлама толыққанды жасақталған соң, өз күшіне енбек. Бұл мәселені үйлестіруді Премьер-Министр тікелей өз міндетіне алды. Ал жұмыс органы Болат Жәмішев бастаған Қаржы министрлігі болады, деп атап өтті К.Мәсімов.
Венера ТҮГЕЛБАЙ.