Мемлекет басшысы Нұрсұлтан Назарбаевтың атына Қазақстан азаматтарынан Астанада ЕҚЫҰ Саммитінің табысты өтуіне және Қазақстан Республикасы Тәуелсіздігінің 19 жылдығына байланысты құттықтау хаттар келіп түсуде, деп хабарлады Қазақстан Республикасы Президентінің баспасөз қызметі.
Қостанай облысындағы № 9 Денисов кәсіптік лицейінің оқушылары жолдаған хатта Мемлекет басшысын Астанада ЕҚЫҰ Саммитінің табысты ұйымдастырылуымен және өтуімен құттықтаған. «Біз – Тәуелсіз Қазақстанның құрдастарымыз, өз Президентімізге деген құрметіміз бен ықыласымызды жеткізгіміз келеді. Бізді бүкіл әлем біледі, бұл – үлкен мақтаныш! Сізге, Нұрсұлтан Әбішұлы, жастарға көрсетіп келе жатқан қамқорлығыңыз үшін рахметімізді айтамыз. Мемлекеттік қолдаудың арқасында, біз жақсы жабдықталған оқу сыныптары мен зертханада жұмысшы мамандығын алу үшін кәсіптік лицейде оқып жүрміз. Жылы да жайлы жатақханада тұрамыз. Бізге жағдайдың жасалып отырғаны – Сіздің күш-жігеріңіздің, қызметіңіздің және қамқорлығыңыздың нәтижесі. Біз еліміздің болашағы жолында атқарып жатқан ісіңізде Сіздің тірегіңіз боламыз!» делінген хатта.
«Черниговское» ЖШС директоры Имран Гучигов өз хатында Қостанай облысындағы Әулиекөл ауданының тұрғындары атынан Мемлекет басшысын ЕҚЫҰ Саммитінің табысты өтуімен құттықтайды. «Саммит күндері барлық қазақстандықтар үшін айтулы күн болды. Өз еліміз үшін, біздің ортақ табысымыз үшін көңіліміз мақтаныш сезіміне толды. Сіз Қазақстанның беделін көтеріп, халықаралық аренада танылуына ықпал еттіңіз. Біздің еліміз саяси, экономикалық және өзге де салалардағы маңызды стратегиялық серіктес ретінде өзін танытты. Біз көп ұлтты елде өмір сүріп, еңбек етіп келеміз. Елімізде жайлы, тыныш, өзара түсіністік пен достық орныққан. Біз әрдайым осыны есте сақтап, осы құндылықтарды бағалай білуіміз керек. Өйткені ортақ береке-бірлік пен біздің еліміздің болашағы біздерге байланысты», деп атап көрсетілген хатта.
Қостанай облысы, Денисовка ауылындағы мешіттің имамы К.Исмаилов пен православие шіркеуінің игумені А.Даништың хатында Нұрсұлтан Назарбаевтың саясатының арқасында ашықтық, төзімділік, тыныштық және келісім қазақстандықтардың өмірінің ажырамас бөлігіне айналғаны атап өтілген. «Біздің ауданның орталығы Денисовка ауылындағы мешіт пен православие шіркеуі бір алаңның екі жағына орналасқан және адамгершілікке үндейтін және рухани тәлім беруді көздейтін ортақ ісімізге қызмет етеді. Бұған өзіңіз жариялаған Тәуелсіздігімізді алғаннан кейін қолымыз жетті. Оның басында біздің Президентіміз – Сіз тұрсыз!» делінген хатта.
№1 Қарабалық орта мектебінің директоры К.Айтпаева аудан педагогтары атынан Мемлекет басшысын әлемдік деңгейдегі әрі тарихи мәні бар оқиға – ЕҚЫҰ Саммитінің Астанада өтуімен құттықтайды. «Бұл Саммит, Нұрсұлтан Әбішұлы, Сіздің дана және орнықты ұстанымыңыздың арқасында өтті. Бұл шара Сіздің тікелей бастамаңыз бойынша өткізілді. Сіздің жаһандық саясаттағы беделіңіз бен көшбасшылығыңыз қазіргі әлемдегі қауіпсіздік проблемалары мен ынтымақтастық жөніндегі ашық үнқатысу үшін іргетас болды», деп атап өтілген К.Айтпаеваның хатында.
Мемлекет басшысына жүрекжарды құттықтауларын білдіргендердің қатарында – «Жылу» МҚК директоры О.Табергенов, Қостанай мемлекеттік педагогикалық институтындағы орталық жетекшісі И.Тернова, Қостанай қаласының тұрғыны М.Бут, Рудный қаласының тұрғыны С.Иванюк пен С.Кравчук бар.