АСТАНА. 26 қаңтар. Боливияның астанасы Ла-Пас қаласына таяу маңдағы Юнгас аймағында Перу мемлекетінің «Элегансия» оркестр тобы мінген автобус жардан құлап, 9 адам қаза тапты. Бұл туралы ТАСС ақпарат агенттігіне сілтеме жасаған egemen.kz тілшісі хабарлады.
Полиция қызметкерлерінің айтуынша, 100 метр биіктіктен құлаған автобус ішінде 13 музыкант болған. Олардың төртеуі ауыр жарақат алып, Ла-Пас қаласындағы ауруханалардың біріне жатқызылды. Құтқарушылар тобы қаза тапқандардың денесін іздеуге кірісті.
Апаттың себебі әзірге белгісіз. Мамандар көлік жүргізушісі жол ережесін сақтамай, жоғары жылдамдықпен жүрген. Арнайы қойылған тосқауылды соғып өтіп, биік жардан құлаған деген болжам жасады. Аймақ тұрғындары аталған жерде жол апаттары жиі болатындықтан «өлім жолы» деген атау берген.
Айта кетейік, Боливияда жылына орташа көрсеткіш бойынша, 1 мыңға жуық адам жол-көлік оқиғасынан мерт болса, 40 мыңнан астамы түрлі жарақат алады.
Аян Әбдуәли.
Дерек: ТАСС.
Сурет: ria.ru.