Көпбаевтар көп болса!

  Бұқаралық спорт дегенде қалалықтардың қағанағы қарқ, сағанағы сарқ. Үйден аттап шықсаң болды – таңдаған спортыңның жалына қол саласың... Осыған қарап отырып ауылдықтарды аяйсың. Жазды қойшы, топырақты шаңдатсаң да доп теуіп, футбол ойнайсың. Ал қыс баласы ше? Кешке қарай жұмысынан келіп, малын жайғап болған соң бір уақ дененің құрыс-тырысын жазайын десе жұрттың барар жері жоқ. Мектептің аядай ғана спорт залына соқталдай-соқталдай жігіттер қайдан сыя қойсын және де қалай дегенмен де, оқушы балаларға арналған мемлекеттік мекеме ғой ол. Түнеугүнге дейін Жаңаарқа ауданын­дағы Түгіскен деген ауылдағы ахуал да тура осындай болып келген еді. Ал қазіргі жағдайы адам танымастай өзгерген. Ая­дай ғана ауылда жергілікті шаруа қожа­лығының басшысы Қайрат Көпбаев деген мырза қалтасынан 110 миллион теңге шығарып, спорт кешенін салып берді. Әлбетте, түкпірдегі Түгіскенге осындай тарту жасаған фермердің бұл тірлігін «Биз­нестің әлеуметтік жауапкершілігі» деп те жалаулатуға болады. Президентіміздің кәсіпкерлерді елдің мұқтажына қарай­ласуға шақырған үндеуіне мүбәрак іспен жауап берген ірілік деп бағалағанға да сыяды мұныңыз. Қалай дегенмен де, Қайрат Көпбаев деген атымтай-жомарт азаматтың туған жерге деген перзенттік ма­хаббаты мен үлкен адамгерші­лігін ауызға алдымен алған жөн шығар. Қайрекеңнің өзі көпбалалы отбасынан шыққан. Еңбекпен көзін тырнап ашқан жан. Осы күніне өз маңдай терімен жеткен ер екен. Бүгінде еңбегі жанып, тасы өрге домалаған. Өзінен артылғанмен ағайынға қарайласып, енді, міне, туған ауылына да шарапатын тигізіп отыр. Көсегең көгергір Көпбаевтың «Мақсат» деп аталатын шаруа қожалығы қазақтың ақбас тұқымды сиырын өсірумен айналы­сады. Бүгінгі күнде аталған шаруа қожа­лығында 30-ға тарта адам еңбек етіп, бала-шағасын асырап жатыр. Кәсіпкердің болашаққа деген жоспары да көңіл сүйсінтеді. Алдағы уақытта ол спорт кешеніне жапсарластырып бассейн салмақшы. Одан кейін кішігірім қо­нақүй де бой көтермек. Бұл дегеніңіз, Түгіс­кен­ге түкпір-түкпірден спортшылар келіп, спорт­тың нешеме түрінен турнирлер өтеді деген сөз. Содан кейін кәсіпкер екі «ГАЗель» авто­көлігін сатып алмақшы. Бірін мектепке, екіншісін спортшыларға тарту етпек. Ауылдың азаматы осындай игі істерді тындырып тастағанда аудан, облыс басшылары да сырттан бағып қана тұрмады. Аудан әкімі Ғабдрахман Омаров өзі қадағалап, кәсіпкерге құрылысқа деп жер берді, су, электр және жылумен қамтамасыз еттірді. Ал облыстың әкімі жаңа спорт кешеніне деп күрес кілемін сыйға тартты. Бұл кілем сол күні ұзындығы 36 метр болатын спорт залына төселді. Залдың бос қалған екінші жартысына волейбол, баскетбол және мини-футбол ойнауға әбден болады. Жалпы, бұл жерде спортшы қауымға барлық жағдай жасалған. Шешінетін жер, жуынатын бөлмелер, жаттығу залы бар. Қаланікінен бір де кем емес. Жаңа спорт кешені білікті маман – жат­тықтырушысыз жетімсіреп тұрар еді. Ал бұл жағынан түгіскендіктердің жолы болды деп нық сеніммен айтуға болады. Өйткені, ауылда күрестің жілігін шағып, майын іш­кен мамандар баршылық. Солардың бірі – Түгіскен орта мектебінде дене тәрбиесі пәнінің мұғалімі болып жұмыс істейтін Халил Әбенов. Халилдің өзі кезінде кү­рес­кен, КСРО спорт ше­бері, қазір дзюдо және қазақ күресінен жаттықтырушы. Оның шәкірттері де біраз белестерді бағын­дырыпты. Бүгінгі күнде спорт кешені 80 пайызға керек-жарақпен жабдықталған. Жетіспеген спорттық құралдарға тапсырыс беріліпті, қаладан әне-міне әкелінуі тиіс деп күтіп отырған жайлары бар. Жаңа спорт кешенінің салтанатты жағ­дайда өткен ашылу рәсімінде ауыл ақ­сақалы Қожантай Омаровтың ақ батасынан кейін, Жаңаарқаның жам­позы, самбо күресінен Әлем ку­бо­гы­ның иегері, Қазақстанның еңбек сіңір­ген жат­тық­ты­рушысы, бүгінгі күн­де Олим­пиада ре­зерв­терін даярлау орта­лығының директоры болып қызмет ететін Жанат Байшолақов құттықтау сөз сөйледі. Мемлекет басшысы өзінің кезекті бір Жолдауында 2020 жылға дейін қа­зақ­тандықтардың 30 пайызы бұқаралық спортпен шұғылдануы керек деген міндет қойды. Қу тақырға шөп шықпайтыны секілді, спорттық инфрақұрылым болмаса, мақсаты айқын бұл межеге қолжеткізе қоюдың өзі қиямет-қайым іс қой. Ал бұл бағытта Түгіскеннің ұпайы түгел. Өйткені, бұл ауылға спортқа деген жанашырлықтың дәні сіңген. Қайрат ӘБІЛДИНОВ, «Егемен Қазақстан». Нұрлан ӘБІЛДИН, журналист. Қарағанды облысы, Жаңаарқа ауданы.