Көкшетау қаласында Коммунистік халық партиясы орталық комитетінің басшылығы «Қазіргі заманғы коммунистік идея» тақырыбында жастармен кездесу өткізді. Бұл шараға партия көшбасшысы Владислав Косарев, партия хатшысы Тұрғын Сыздықов қатысты.
Облыстық кәсіподақтар кеңесінде өткен жиынға қатысушыларға арнаған сөзінде партия көсемдерінің бірі, бұрынғы Көкшетау облыстық кәсіподақтар кеңесінің төрағасы Владислав Косарев «Қазіргі кезеңдегі Коммунистік идеяның өзектілігі» тақырыбында баяндама жасады. Шешен өз сөзінде, еліміздегі көппартиялық құрылымның демократиялық ұстанымдарды қалыптастырудағы маңызын айрықша атап өтті.
Коммунистік халық партияның хатшысы Тұрғын Ысқақов біздің болашағымыз жастардың қолында екендігін атап өтіп, партия қызметінің қазіргі уақыттағы негізгі ұстанымдарына назар аударды. Ол коммунистік партияның уақыт ағымдарымен бірге дамитындығын, қазіргі қалыптасқан жағдайларға байланысты қызмет жасап, қоғамдық үрдістерге ықпал ететіндігін бірінші сатыға қойды. Қоғам демократиялық негіздермен қуаттанатындығы үнемі алда болуы тиіс деген пікірді басқосуға қатысушылар қолдап отырды.
Кездесу соңында партияның өңірлік деңгейдегі жастар қанатының жетекшісі Әлия Еламанова алдағы электоралды компанияда жастардың белсенді қызмет атқаратынына сенім білдірді.
Бақберген АМАЛБЕК,
«Егемен Қазақстан».
Ақмола облысы.