Елімізде алғаш рет қыз балалар әскери мамандық алып шығады. Осы жылы Қорғаныс министрлігінің бастамасы бойынша барлық азаматтық жоғары оқу орындарындағы әскери кафедраларда студент қыздарға арналған мамандықтар ашылды. Әскери кафедраға оқуға түсу үшін олар медициналық куәландырудан өтіп, денешынықтыру даярлығы бойынша нормативтер мен психологиялық тестілеу тапсыру қажет. Ал барлық көрсеткіштер комиссия отырысында қаралады.
– Әскери кафедрада білім бере отырып, біз қыздарға бірден Қарулы Күштерінің офицері ретінде өзін айқындауға мүмкіндік береміз. Ол үшін Қазақстандағы барлық жоғары оқу орындарынан әскери мамандық аштық. Оқу аяқталғаннан кейін барлық үйренушілерге «запастағы лейтенант» әскери атағы беріледі және олар автоматты түрде Қарулы Күштерінің жұмылдыру резервіне енгізіледі, – деді Қорғаныс министрлігі білім және ғылым департаментінің бастығы Айгүл Төлембаева.
Айта кетейік, аталған мамандықты игеру барысында қыздар ер балалармен бірге саптық, жауынгерлік даярлық, жарғы, әскери топография секілді пәндерді оқып, осы бағыттағы ғылыммен айналыса алады.
Талғат РАЙЫМБЕК,
«Егемен Қазақстан».