24 қаңтарда Мәскеу уақыты бойынша 16 сағат 32 минөтте Домодедово әуежайында террорлық әрекет жасалды. Соңғы мәліметтерге қарағанда, жанкешті денесіне жасырылған жарылғыш құрылғылардың салмағы 7 кило тротилге жуық. Жарылыс салдарынан 35 адам қаза тауып, 180-нен астам адам жарақат алды. Олардың 110-ға жуығы ауруханаға жатқызылды. Қаза тапқандардың арасында шетелдік азаматтар да бар. Осыған байланысты Ресей президенті Дмитрий Медведев Давоста өтетін форумға сапарын доғарды.
Орталық Африка Республикасында президенттік және парламенттік сайлау аяқталды. Сайлаудың алдын ала қорытындысы сегіз күннен кейін жария етіледі. Кейбір мәліметтер бойынша, елдің қазіргі президенті Франсуа Бозизе жеңіске жетуі мүмкін.
Израиль сыртқы істер министрлігінің қызметкерлері ереуілді тоқтатты. Дипломаттардың бірнеше аптаға созылған бұл акциясына негізінен олардың жалақыларының төмендігі себеп болған. Өйткені, дипломаттардың жалақысы 17 жылдан бері көбейтілмеген көрінеді.
Бразилиядағы су тасқыны мен жер көшуінен құрбан болғандардың саны 806 адамға жетті. Рейтер агенттігінің ақпараттары бойынша, із-түзсіз кеткендердің қатары 300-ге жуықтайды. Опат болғандардың арасында балалар мен жасөспірімдер көп.
Грузияның экс-президенті Эдуард Шеварднадзе кеше өзінің 83 жасқа толуын атап өтті. Экс-президент көмекшісінің мәлімдеуінше, Э.Шеварднадзе туған күнін өз отбасы мен жақын туыстарының ортасында тойлаған.
Шанхай қаласында әлемде баламасы жоқ көрме орталығы салынатын болады. Оның құны – 3,5 миллиард доллар. Орталықтың құрылысы 2011 жылдың соңында басталып, 2014 жылы пайдалануға беріледі. Көрме орталығының жалпы алаңы 500 мың шаршы метрді құрайды.
ОПЕК-ке қатысушы елдер сұраныстың өсуіне байланысты биылғы жылы мұнай жеткізуді арттыруы мүмкін. Сауд Арабиясы министрінің хабарлауынша, ОПЕК-ке мүше елдердің күнделікті өндіретін мұнайы 6 миллион баррель деңгейінен аспауы тиіс.
Филиппиннің астанасы – Манила қаласында жолаушылар автобусында жарылыс болды. Жарылыс салдарынан екі адам қаза тауып, 15-ке жуығы жараланды. Елдің құқық қорғау органдары жарылысты белгілі терроршы ұйымдар жасады деген болжам жасап отыр.
Грекия үкіметі Германияның Siemens концернін сотқа бермек. Концерн басшылары Грекияның шенеуніктерін «сатып алған» деген күдік бар. Ақпарат көздеріне қарағанда, осыған байланысты Грекия парламенті 11 айға жуық тексеріс жүргізген. Осының салдарынан ел қазынасына 2 миллиард еуро кем түскен.
Интернет материалдары негізінде әзірленді.
