Сапасыз тауардың құнын қайтарды

Әлбетте, әр тұтынушы өзінің заңды құқығын қорғауды жетік біле ме? Әрине, бәрі бірдей демесек те, кейбірі күнделікті күйбең тірліктің қамымен жүріп, көбінесе сатып алған тауары сапасыз болса да, қолын бір сілтеп жүре береді. Дегенмен, атыраулық тұтынушының бірі сапасыз тауарға төлеген ақшасын қайтару үшін сотқа жүгінді. Өйткені, тұтынушы «КазОбувь» ЖШС дүкенінен құны 21 525 теңгеге бағаланған қысқы аяқ киім сатып алған. Алайда, үш күннен кейін сатып алған қысқы аяқ киімнің ыңғайсыз қалпының кесірінен жүрген кезде аяқта қолайсыздық пайда болған. Соның салдарынан тобығы алға қарай жылжып, екі аяғының башпайлары бүгіле берген. Осыдан кейін тұтынушы дүкенге жарамсыз аяқ киімді тапсыру үшін келіпті. Алайда, дүкен меңгерушісі тауарға төленген ақшаны қайтарудан бас тартқан. Маңдайы тасқа соғылғандай кейіпке түскен тұтынушы өз құқын сот арқылы қорғауға қадам жасады.  Сөйтіп, сот арқылы талап қоюшыға айналған тұтынушы «Тұтынушылардың құқықтарын қорғау туралы» Заңның 14-бабымен белгіленген 14 күн ішінде тауарды қайтаруға ниет білдірген. Сот, талап қоюшының пайдасына «КазОбувь» ЖШС-нен сапасыз тауарға төленген 21 525 теңгені, 12 485 теңге көлеміндегі айыппұлды, бұған қоса, 20 000 теңге моральдық зиян өтемақысын және сот шығындарын, сөйтіп, барлығы 65 087 теңге өндіріп берді. Жолдасбек ШӨПЕҒҰЛ, «Егемен Қазақстан» АТЫРАУ