Қазір қиыршық тасқа деген сұраныс жоғары болып тұр.Бұл да түсінікті. Жыл сайын құрылыс индустриясы қанатын кеңге жайып келеді, ал жұмысы қарқынды басталған «Батыс Еуропа-Батыс Қытай» көлік дәлізіне де бұл өнім аса қажет-ақ. Осыны ескерген «Текше Тас компаниясы» ЖШС жаңа қиыршық тас зауытын іске қосып, ел тәуелсіздігінің 20 жылдығына тартымды тарту жасады. Жылдық қуаты 1 миллион тонна қиыршық тас шығаруға мүмкіндік беретін кәсіпорын құрылысы бір жарым жылда салынып бітті. Мұнда орнатылған Швецияның «Sandvik» фирмасының қондырғысы осы заманғы озық технологияға жатады. Мұндай технологиямен жұмыс істейтін зауыт достастық елдерінде жоқ. Компания бұл қондырғыны 1,7 миллион долларға сатып алды. Мамандардың айтуынша, кәсіпорын қалыпты жұмыс істеген жағдайда өзін бес жылда ақтайды. Зауыт тұтынушылардың тапсырысы бойынша әр түрлі мөлшердегі қиыршық тасты көп мөлшерде шығара алады. Таудың тасы қажетті көлемге жеткенше күрделі өндірістік процестен өтеді.
Мұнда теңізде жасанды арал жасауға қажетті текше тасты шығарудың мүмкіндігі де мол. Гранит жасалатын бұл текше қиыршық тастар суға төзімді, босап кетпейді. Қиыршық тастың бұл түріне Каспий теңізінің үстінде мұнай өндірумен айналысатын «Аджип» компаниясынан қазірдің өзінде тапсырыс түсіп үлгерген. Болашақта көшелерді қайта жарақтандыруға пайдаланылатын түрлі-түсті гранит жол жиектерін дайындау қолға алынбақшы.
Зауыт жоспарлы қуатына шаққанда сағатына 270 тонна қиыршық тас өндіретін болады. Кәсіпорын өздеріне қажетті мамандарды алдын ала даярлап алған. Жаңадан ашылған жұмыс орындарында негізінен жергілікті халық жұмыс істейді.
Сатыбалды СӘУІРБАЙ, Ақтөбе облысы.