Татарстанмен ынтымақтастық

интеграцияны кеңейтеді, инвестицияны көбейтеді Жақында Қостанай облысының әкімі Архимед Мұхамбетов бас­таған құрамында «Тобыл» ӘКК өкілдері, ірі өнеркәсіп және ауыл шаруашылығы кәсіп­орын­дары басшылары бар облыс делегациясы Татарстанда бо­лып қайтты. Туысқан татар елі экономикасында ауыл шаруа­шылығы өңдеу өндірісінің, құс шаруашылығының және машина жасау өндірісінің даму қарқыны ерекше. Оларда үйре­нетін үрдістер жеткілікті. Облыс делегациясының мақсаты да озық технологиялармен танысу, екіжақты алыс-беріске келісім жасау болатын. Екі күндік сапарда қостанайлықтар «Ақ барс» құс шаруашылығы кешені» бір­лестігінің Лаишев филиалын­да, «Майский» жылыжай комбинатында, «Форд соллерс» автомобиль зауытында болды. «Қазан» агроөнеркәсіптік паркі нағыз инно­ва­циялық өңдеу жүйесі болып табылады. 5 мың шаршы метр аумаққа 8 шағын өңдеу цехы орналасқан, мұнда барлық санитарлық нормалар сақталған, олар ауыл шаруа­шылығы өнім­дерін өңдеумен айналысатын кәсіп­керлерге жалға беріледі. Сонда бизнесін бастаған олар­дың шығыны өте аз болады. Өн­ді­рілген өнім саудаға осы жерден тікелей шығарылады. Ауыл шаруашылығы өнеркәсібі паркінің директоры Олег Власовтың айтуынша, осында ұйымдастырылған сауда алаңының арқасында тұтынушыға өнім базар бағасынан 20 пайызға арзан болып жетеді. Татарстанның басқа қалаларында да осындай кешеннің кішігірім түрлерін ашу ойда бар екен. Ауыл шаруашылығы өнімдерін өңдеу мен оны сатуда проблемалы мәселелері әлі де жеткілікті Қос­танай облысы үшін татар аға­йын­дардың мына тәжірибесі үй­ренетін-ақ үрдіс екен. Қостанай облысында екі ин­дустриялық аймақ құры­лы­сы­ның басталуына және онда өн­дірістік өнеркәсіпті кеңейту, әсіресе, автомобиль бөлшектері кәсіпорнын құру мақсатына орай, Татарстандағы индустриялық парк тәжірибесіне ерекше көңіл бөлінді. Сонымен қатар, облыс басшылығы мен бизнес-құрылым өкілдері Татарстан­дағы «Химград» технополисін, «Алабұға» ерекше экономика­­лық ай­­мағын және жұмысын зама­науи технология саласына қарай бұр­ған ІТ-паркін, «Мастер» ин­дустриялық аймағын аралап көрді. Мұның барлығы да мемлекет пен жекеменшік әріптестігінің тамаша мысалы болып табылады. Мемлекет тарапынан парк аумағында бизнестің дамуына қолайлы жағдай жа­салған, яғни коммуналдық ин­фрақұрылым, көлік логистикасы, резиденттер үшін салық және кедендік жеңілдіктер толық қамтамасыз етілген. Осылайша, аймақ үшін дәстүрлі өндіріс салаларын сақтау, әсіресе, шетелдік ком­паниялар үшін бизнес климатты жақсарту, шағын және орта бизнеске ынтыландыру, жұмыс орындарын ашу, бюджетке қаржы түсіру сияқты бірнеше мәселе қатарынан шешімін тап­қан. Мұндай мәселе­лердің бар­лығы да Қостанай облысы үшін маңызды екені даусыз. Өндіріс нысандарын аралаған кезде Қостанай облысының әкі­мі Архимед Мұхам­бетов пен Татар­стан премьер-министрі Ильдар Ха­ликов болашақтағы нақты ынты­мақ­­тастық мәселелерін талқылады. Сапар аясында Архимед Мұ­хамбетов Татарстан Респуб­лика­сының президенті Рустам Ми­ннихановпен кездесті. Татар­стан президенті қазақ пен татардың рухани байланысы ғасырлар тере­ңіне кететінін атап өтті және туыс­қан халықтар ара­сындағы ын­ты­мақты нығайту үшін көп жұмыс атқарып келе жат­қан Қа­зақ­стан Президенті Нұрсұлтан Назар­баевқа риза­шылығын білдірді. Татарстанда Қазақстанмен бірлескен 36 кәсіпорын жұмыс істейді. Сондай-ақ, Татарстанның «Татнефть», «КамАЗ», Қазан тікұшақ зауыты, «КЭР-холдинг», Зеленодоль кеме жасау зауыты, Серго атындағы зауыт секілді ірі кәсіпорындар Қазақстанда да белсенді жұмыс істейді. «Бізде машина, тікұшақ құрас­тыру, мұнай өнеркәсібі саласында бірлескен жобалар көп. Агро­өнеркәсіп секторында, ауыл шаруашылығы өнімдерін өңдеп, сату саласында Қостанай облы­сымен ынтымақтаса жұмыс істей­міз деп ойлаймын. Әрине, об­лыстың минералды шикізат бай­лығын ескере отырып, ынты­мақтастықтың индустриялық мүмкіндігін де қарастыратын боламыз», деді Татарстан прези­денті. Сонымен қатар, ол мәде­ниет және білім саласындағы бай­ла­ныс­тардың да нығаятынын атап өтті. Өз кезегінде Қостанай облы­сының әкімі  бұл кездесуді екіжақты инте­гра­цияның жарқын үлгісі екенін айтты. Ол Қостанай облысы Қазақ­станның аграрлық-өндірістік ай­мағы екенін айта келіп, облыс әкімі соңғы жылдары өнеркәсіп пен ауыл шаруашылығы өнімін өңдеу саласын дамытуға бет бұрғанын тілге тиек етті. Облыста жүзеге асыруға жоспарланған жоба­ларды, облыстың инвес­ти­ция­лық болашағы зор аймақ­тарымен таныстырған облыс әкімі татарстандық компания­лар­ды бірлесіп жұмыс істеуге ша­қырды. Айтқандай, жыл басын­да Қазан қаласында «Тобыл» ӘКК мен Татарстан инвес­ти­ция­­лық агенттігінің арасында облысқа инвестиция тарту жө­ніндегі ынты­мақтастық келі­сімге қол қойылған болатын. Жер­­гілікті бизнесті қолдау және шет­елдік компанияларды тарту тәжі­рибелерін үйрену үшін оларды қарау, танысу маңызды. «Біз өндіріс көлемін ұлғайту мен өзіміздегі экологиялық таза өнімнің экспорттық географиясын кеңейту мәселелері бойынша ұсынысты қарауға дайынбыз», деді Архимед Мұхамбетов. Татарстан делегациясының алдағы уақытта Қостанайға жауап сапары болады. Нәзира ЖӘРІМБЕТОВА, «Егемен Қазақстан» ҚОСТАНАЙ