Көшпелі отырыс

денсаулық сақтау мәселесін сөз етті Жуырда Астана қаласының №2 ауруханасында денсаулық сақтау саласын дамытудың 2016-2019 жыл­дарға арналған «Денсаулық» мемлекеттік бағдарла­масын іске асыру мәселелері бойынша Қазақстан Республикасы Парламенті Мәжілісі Әлеуметтік-мәдени даму комитетінің көшпелі отырысы өтті. Осы мемлекеттік бағдарламаға сәйкес, өмір сүрудің күтілетін ұзақтығын ұлғайту, медициналық қызметтерге қолжетімділікті және сапасын арттыру, денсаулық сақтау саласын қаржыландыру және басқару жүйесін жақсарту денсаулық сақтау саласының стратегиялық мақсаттары болып табылады. Оның ішінде, мынадай: жіті миокард инфаркты, ми қан айналымының жіті бұзылысы (инсульт), жаңа қатерлі ісіктер, жарақаттар, жүктілік және босану сияқты бес негізгі әлеуметтік мәні бар, сондай-ақ, елдің демографиясына айтарлықтай әсер ететін аурулар бойынша арнайы іс-қимылдар жоспарын іске асыру көзделіп отыр. Жиын барысында депутаттар аурухананы аралап көріп, ондағы емдеу ісімен жақыннан танысты. «Денсаулық» мемлекеттік бағ­дарламасын іске асыру мәселеле­рі бойынша Денсаулық және әлеуметтік даму вице-министрі Е.Біртанов аталған тақырып шеңберінде егжей-тегжей баяндама жасады. Ол өз сөзінде: «Болашақта смартфондар кең қолданысқа шығады деп ойлаймыз. Осы мобильді қосымша арқылы кез келген емделуші өз-өзін қабылдауға жаза алады. Тиісті емдеу мекемесіндегі кезекті қарап, оған тіркелуге мүмкіндігі бар. Сондықтан да болар, қазіргі таңда, бізде ІТ-мамандарына деген сұраныс жоғары болып тұр» деді. Көшпелі отырысқа қаты­су­шы­лар белсенді түрде пікір алмас­ты. Аталған аурухананың бас дәрігері Иван Ли, Мәжіліс депу­тат­тары сөйлеп, осы мәселеге қатыс­ты қызу сауалдар қойылып, тиіс­ті жауаптар берілді. Отырыста айтыл­ған пікірлерді Әлеуметтік-мәде­ни даму комитетінің төр­айы­­мы Гүлнар Ықсанова қоры­тындылады. Раушан СҮЛЕЙМЕНОВА