Топырақ Таразда зерттеледі

Бір кездері «Казгипрозем» инс­­титутының Жамбыл филиалы деп аталған бұл мекеме өңір­де жобалау-іздестіру және бақылау жұмыс­тарын орындаумен айналысқан екен. Сол жылдары өзінің дербес зерт­ханасы болып, 1990 жылдар­дың басына дейін жұмыс жасап­ты. Кейін топырақ зерттеу жұмыс­тарына мемлекеттік тапсырыс­тар мөлшерінің кемуі мен қаржының болмауы себепті зертхана жабылған. Енді міне, өткен аптада Жер ресурстарын басқару комитетінің «Жер кадастры ғылыми-өндірістік орталығы» шаруашылық жүргізу құқығындағы республикалық мем­лекеттік кәсіпорнының Жам­был филиалының директоры Н.Артаев­тың және «ЖерҒӨО» РМК-ның бас директоры Ғ.Қарқынбаевтың қол­дауымен жаңа топырақ зерт­хана­сының құрылысы аяқталып, қазіргі заман талаптарына сай жаңа құрал-жабдықтармен қамтамасыз етіліп, іске қосылды. Зертхананың талаптарына сай инженер, агрохимиктер, химиктер жұмысқа қабылданды. Зертханада топырақтың химиялық құрамын анықтап, сараптама жүргізіледі. Осы сараптамалардың нәтижелерінде топырақ материалдары жаңартылып қолданысқа пайдаланылады. Топырақтың құ­нарлылығын, құрамының өзгеріс­терге ұшырағанын анықтауға жыл сайын  республикалық бюджеттен қаржы бөлініп, көптеген жұмыстар атқарылуда. Бұған дейін зертханалық сараптамалар Шымкент қаласындағы «ЖерҒӨО» РМК Оңтүстік филиалында дайындалатын. Яғни, зертханалық сараптама жүргізуге жылына 3-4 млн. теңге төленіп отырды. Енді осы жұмыстардың барлығы мекеменің өз зертханасында атқарылады. Ал, ағымдағы жылы республикалық бюд­жет қаражаты есебінен Т.Рыс­құлов, Қордай аудандарының жер­леріне мониторинг жүргізу жоспарланып, жұмыстар басталып та кетті. Топырақ зерттеу барысында алынған материалдар жер кадас­трын, жер мониторингін жүргізу бойынша жұмыстарды атқаруға, жерге орналастыру жобаларын жасау үшін, шаруа қожалықтарын пас­порттау үшін, табиғи малазықтық алқаптардың және жердің жай-күйін сапалық бағалау үшін, жерге төленетін құнның мөлшерін, жерге төленетін салық пен жалға беру құнын анықтау үшін негіз болып саналады. Топырақтың қасиетін біле отырып, ауыл шаруашылығын қолдау мақсатында мемлекеттік бағдарламаларды атқаруға, суландыру жүйесін құруға және пайдалануға болады. Сондай-ақ, тыңайтқыштарды, заманауи техниканы пайдалануды жоспарлауға, ауыл шаруашылығын жүргізудегі алдыңғы қатарлы әдістерді енгізуге де мүмкіндік ашылады. Оралхан ДӘУІТ, «Егемен Қазақстан» Жамбыл облысы