Келісім бар жерде еңбекке де,

байлыққа да, бақытқа да орын табылады Өңірге жұмыс сапарымен келген Мемлекеттік хатшы Гүлшара Әбдіқалықова мен облыс әкімі Болат Бақауов облыс орталығындағы «Қазақстан Алюминийі» АҚ-та болды. Кәсіпорынның мәжіліс залында өткен «Жұмысшы жастар кеңесінің» жиынына өңірдегі өндіріс орындарында еңбек етіп жүрген 200-ден астам жас қатысты. Кездесу барысында Г.Әбді­қалықова мен Б.Бақауовқа «Қазақ­стан электролиз зауытында» шығарылған павлодарлық алюминий құймасы сыйға тартылды. Бұл күндері өңірдегі өндіріс орындарында 35 жасқа дейінгі 56 мың жас жұмысшы мамандығы бойынша еңбек етуде. Мысалы, «Павлодар мұнай-химия зауыты» ЖШС инженері Данияр Күшеновтің айтуынша, өндіріс орындарына келген жастар білімдері мен біліктіліктерін де шыңдауда. Және де қазіргі талапқа сай жастар өндірісте жаңа технологиялық құрылғы, қондырғылармен жұмыс жасап, алдағы уақытта кәсіпорынды жаңғыртуға үлес қосады. Г.Әбдіқалықова елімізде жүзеге асырылып жатқан жастар саясаты мәселесіне тоқталды. Еліміздің барлық облыстарында 17 жұмысшы жастар кеңесі бар. Барлық кәсіпорында жастардың білім алып, біліктілігін арттыруы үшін шаралар қабылданады. Павлодар облысының 45-ке жуық жоғары және орта кәсіптік, коллеждерінде дуалды оқыту жүйесі енгізілген. Енді алдағы жылдардан бастап барлық жастар үшін кәсіптік-техникалық білім алу тегін болады. Соңғы кездері елімізде 2,4 млрд. доллар колледж студенттерін оқытуға жұмсалған. Адам капиталын дамыту міндеті қойылып, білім беру, денсаулық сақтау және жастардың әлеуметтік қорғалуына баса назар аударылып отыр, деді Мемлекеттік хатшы. Сонымен қатар, кездесуде Г.Әбдіқалықова жастарға елдегі жастар саясаты туралы заң мен қазақстандық жастарға білім алуға, жұмыс істеуге, біліктіліктерін арттыруға, білім алудағы әлеуметтік пакеттер мен жеңілдіктерді пайдалануға жол ашатын өзге құжаттар жайлы баяндады. Ал зауыт жас­тар кеңесінің басшысы Оксана Паршукованың айтуынша, кәсіп­орында құрамында 23 жас бар кеңес жұмыс жасайды. Біздің кәсіпорын облыс орталығындағы Ворушин атындағы саябақты қамқорлыққа алған. Биыл 300-дей кәсіпорынның жас жұмысшылары саябақты қалпына келтіру, тазалау жұмыстарына қатысты. Зауытта 2500-дей жас маман еңбек етеді. Оларға жас­тар қоғамдық кеңесі тарапынан қолдау көрсетіліп, қажетті әлеуметтік жағдайларына назар аударылады, деді О.Паршукова. Бұдан кейін Г.Әбдіқалықова облыстағы «Іскер әйелдер қауым­дастығымен» де кездесті. Жалпы, облыста 148 ауылдың 25-ін әйел басқарады. Соңғы жылдарда облысымызда түрлі саланы басқа­рып отырған әйелдер қауымының саны артқан. Мысалы, 22 облыс­тық басқарманың бесеуін әйел­дер басқарады. Ал бас­қармалар басшыларының орынбасарлары арасында олардың саны – 9. Сонымен қатар, жергілікті ат­қару­шы биліктің барлық мем­лекеттік қызметкерлерінің 73,3 пайызы әйелдер, деді кездесуде облыс әкімінің орынбасары Мейрам Бегентаев. Ал, ең бастысы, әйел-аналар­дың денсаулығын сақтау үшін олардың скринингтен өтуіне 84 миллион тенге бөлінген. Бұл туралы Г.Әбдіқалықованың өңірдегі әйелдер қауымының өкілдерімен кездесуі барысында №2 перзентхананың бас дәрігері Айман Оспанова мәлім етті. Яғни, скринингтік тексерудің нәтижесінде әйелдер арасында жаңадан пайда болған қатерлі ісіктің төмендеуі байқалады. Сүт безінің қатерлі ісігі 2,1 пайызға және жатыр мойны қатерлі ісігі 0,5 пайызға азайған. Облыс емдеу орындарында 10 маммо­графия­лық кабинет жұмыс жасайды. Түстен кейін Мемлекеттік хатшы Гүлшара Әбдіқалықованың қатысуымен «Қоғамдық келісім» сарайында облыстық Қазақстан халқы Ассамблеясының «Тәуел­сіздік. Келісім. Болашағы Біртұтас Ұлт» күн тәртібімен ХХІІ сессия­сы өтті. Сессияны кіріспе сөз сөйлеп ашқан облыс әкімі Болат Бақауов: – Бүгін біз Мемлекеттік хатшы Гүлшара Наушақызының қатысуымен облыстық Қазақстан халқы Ассамблеясының ХХII сессиясына жиналып отырмыз. Сессия жұмысына облыстық Ассамблея мүшелері, қалалар мен аудандардың этномәдени бір­лес­тіктер өкілдері, үкіметтік емес ұйымдардан өкілдер қаты­сып отыр. Елбасы Нұрсұлтан Назарбаев айқындап берген басым бағыттарды орындау, еліміз­дің экономикасын дамыту, Елба­сы­ның бастамасымен қолға алынған «100 нақты қадам» Ұлт Жоспарын жүзеге асыру үшін бірлік, татулық ауадай қажет, – деді. Елбасының ортақ мүддеге жұмылдырған татулық, ынтымақ­тастық, берік достықты сақтау саясаты ел ішінде қолдау тапты. Бұл күндері Отан, тәуелсіздік, тұрақтылық, тұрақты даму деген ұғымдар әрбір қазақстандықтың жүрек-жадынан берік орын алған. Бұл күндері «Достық үйінде» облыстық Қазақстан хал­қы Ассамблеясының хат­шы­лығы, 18 этномәдени бірлес­тік, Ассамблеяның жастар бір­лестігі, ұлттық өркендеу мек­тебі, 9 қалалық ұлттық мәдени бір­лестік, 30-ға жуық аудан, ауылдарда филиалдары, жастардың 14 ұлттық бірлестігі жұмыс істей­ді. 1996 жылы ашылған ұлттық «Жаңғыру» мектебінде қазір 17 ұлт­тың ұл-қыздары, атап айт­қанда, 600-ге жуық оқушы өздері­нің ана тілдерін, салт-дәстүрлерін, тарихын оқып-үйренуде. Г.Әбдіқалықова облыста жасалып жатқан игі шараларға оң бағасын берді. Құрметті жи­нал­ған қауым! Алдымен пав­ло­дар­лықтардың өткен жылы атқарған жұмыстары үшін алғы­сымды білдіргім келіп отыр. Осы атқарылған істердің барлығы да ел бірлігінің озық үлгісі болып табылады, деді ол. Сессия барысында облыстық Қазақстан халқы Ассамблеясы төрағасының орынбасары болып Т.Шевченко атындағы украин этномәдени бірлестігінің басшысы Михаил Парипс сайланды. Шара соңында «Дарынды балаларға арналған музыкалық мектеп-интернаты» директоры Виктор Денисенко мен «Қазақстан корейлері қауымдастығы» облыс­тық филиалының басшысы Руслан Тян Қазақстан халқы Ассам­б­леясының қоғамдық «Бірлік» алтын медалімен марапатталды. Бұдан кейін Мемлекеттік хатшы Гүлшара Әбдіқалықова Жүсіп­бек Аймауытов атындағы қазақ теа­трында өткен мәдениет және өнер қызметкерлерінің күніне арналған мерекелік шараларға қатысты. Фарида БЫҚАЙ, «Егемен Қазақстан» Павлодар облысы Суретті түсірген Валерий БУГАЕВ