«Жас қанат» қанат қақты

Таланттыны танып, өнер­ліні өрге шығаруда «Жас қанат» жобасының алар орны айрық­ша екені айтпаса да айқын. Қа­зіргі қазақ сахнасындағы жа­рық жұлдыздардың жолын ашып, ән әлеміндегі өнер майтал­ман­дарының бастау баспалдағы бол­ған да осы жарыс десек, жаңы­лыспайтын шығармыз. Тәуелсіз елімізбен түйдей құрдас бұл байқаудың биылғы жаңалығы да жетерлік, мақсаттары да маңызды. Сахна саңлақтарын сараптайтын сайыстың шымылдығы кеше түрілді. Сайдың тасындай іріктелген қатысушылардың да қарқыны қатты дейді ұйым­дас­тырушылар. Биылғы үміткер­лердің арасында, «Үш жүз» то­бы (Қарағанды), Нұрислам Қамит­беков (Жезқазған), Қаршыға Иль­танов (Семей), Парасат Отан (Семей), Айберген Болатхан (Тал­дықорған), Ақжол Сапаралы (Алматы), Әдемі Қоңыратбай (Алматы), Ернар Дүйсеев (Ақтө­бе), Жалғас Сұлтанов (Астана), Айбек Дәулетқалиев (Орал), Лаура Таусарова (Ақтөбе), Ай­зада Әлімбекова (Шымкент), Ма­лика Ахметжанова (Өскемен), Нұржан Оразов (Ақтөбе) сынды жүзден жүйрік шыққан жас дарындар бар. Өзінің қалаған өнерпазына қолдау көрсетуге келген көрер­меннің де қарасы қалың. Үш күн бұрын суырылған жеребе бойын­ша сахна төріне алғаш болып «Үш жүз» тобы көтерілді. Белгісіз топтың орындауындағы «Белгісіз жан» әні сәтті шықты деуге болады. Оған көрерменнің қол соғып, қосыла орындауы дәлел. «Жас қанаттың» алғашқы же­ңімпаздары Медеу Арынбаев, Ерлан Көкеев, Мадина Сәдуа­қасова сияқты белгілі өнер жұлдыз­дарынан құралған қазылар алқасы үш күн бойы үміткерлердің талабын тамашалап, бағасын береді. Айта кететін тағы бір жайт, сайыс 22 мамыр күні қорытындыланып, «Жас қанаттың» жаңа жеңімпазы анықталады. Рауан ҚАЙДАР, «Егемен Қазақстан» Суретті түсірген Сұлтан СЕЙІТ